| |
Däss Bahra, (Noch)-Heimat von Bernd Weiß, in aller Munde iss unn als Durrfnoome in die ganz Welt bekannt iss, konn merr jo wohl wallich nedd behaupt. Owwer alle vier Johr, ömmer in a Schaltjohr, blüht Bahra reechelrecht auf, weil merr „Bahra“ zwee Woche lang jeden Dooch mehrfoch in Radio unn Fernsehen hört. Gut, s hängt zwoor ömmer der Zusatz „lümmbiggs“ droo, owwer doss is jo wurscht. Wenn die Leut in Bahra Radio hörrn, unn „Bahralümmbiggs“ gsocht würrd, gädd ihr Herz auf. Ömmer wiedder faszinierend, woss bei denne Behindertenspiele Unglaublichs geleist würrd! Bei die annere Olümmbische Spiele in London a boor Woche devuur, worrn unner Sportler jo nedd so erfolgreich. Die Schwimmer zum Beispiel. Nedd ee Medallie gholt! Ganz Deutschland hodd üüwer Britta Steffen & Co. gezankt. Annerseits muss merr mit Reschbeggd festell: Kee enzicher deutscher Schwimmer iss dersoffe! Doss iss doch woss! Odder worrn se bloß zu blöd dezu, ihr‘n schlechte Zustand zu kaschiern? Die Gewichtheber, speziell der Matthias Steiner, worrn do jo deutlich intelligenter. Iss doss allee jo scho a Riesen-Leistung für n Kraftsportler! Ihr wösst jo woss bassiert iss: Der Steiner hodd bei Olümmbia prowiert, a Gewicht zu stömme, owwer wie eersch hallwer oowe hatt, isses zurück off sein Koopf unn sei Genagg gfalle. Unn doss hodd ins Fernsehn so gfährlich ausgsenn, däss die ganz Welt offn Tod erschrogge iss. Kee Sau hodd nochher merr drüü geredt, däss der Steiner die hochgsdeggde Erwortunge nedd erfüllt hodd. Jeder hodd nur gfräächt, wie‘s ihn gädd unn wos sei Koopf mecht. Unn woos hodd doss jetzt mit die genauso erfolchloose Schwimmer zu tun? Blöd worrn se! Ich wenn Britta Steffen gewasst wär, hädd zum Beispiel inn 100m-Vorlauf so 60 – 70 Meter gemocht und wer dann obgsoffe. Eefoch aufghört zu baddeln: glugg, glugg, weg war se! Ganz Deutschland unn die ganz Welt hädd die Luft ooghallde unn live vuur die Glotze zugeguggt, wie die Britta vo englische Froschmänner von Schwimmboodboode ghold wurrn unn wiederbelebbt wurrn wer. Unn kein Schwein hädd merr drüü gezankt, däss nedd ee Medallie für die Schwimmer rausgsprunge iss. Also, meine Damen unn Herrn Spitzensportler: Nedd nur sportliche Leistung, aach a weng daggdische Intelligenz – doss müsse mir Steuerzahler vo euch doch verlang könn, odder? Servus, der Eustach. |
