| |
Dangges off Deutsch
Wie ich neulich middn guude Bekannte vo Mühlbich geredt hobb, hodd der gemeent: „Wenn ich nochts n hallwer drei in Neuscht off die Schwimmbood-Greuzung zufohr, links nüü off Mühlbich well, unn die Ampel 50 Meter vor mir of „Rot“ springt, wünsch ich mir ömmer, a Italiener zu senn!“ „A Italiener?“ frääch ich. „Worömm denn doss?!“ „Ganz eefoch. Für n Italiener iss a rote Ampel a Empfehlung, nedd mehr! Er guggt, ob woss künnt, unn wenn nedd, biecht er obb. Bis ich als guter, pflichtbewusster unn ordentlicher Deutscher obbgebooche bin, licht der Italiener scho in Mühlbich ins Bett unn schlöfft!“ Aufgereecht woor mei Bekannter. Er hodd owwer aach Racht. Die Ampel in Neuscht schalte die ganz Nocht durch stur unn typisch Deutsch vo Rot off Gaal unn Grün – ganz egal, woss verkehrsmäßig los iss. Mei Meinung, aach für doochsüüwer: A gscheide „Grüne Welle“, intelligente Ampel unn mir dääde mehr CO2 eischboor, wie midd sämtliche 1.000 Eleggdro-Auto in Neuscht zomm! Owwer mir senn halt Deutsche Michel: Nochts hallwer drei, Rot oo die Schwimmbood-Kreuzung. Links kee Auto, rechts kees, unn vürwärts konn merr die Ströss schöö eigsäh. Kee annersch Auto weit unn breit. Egal, mirr bleiwe schö broov stenn unn worrde, bis Grün künnt. Unn soo wie merr uns oo die Ampel verhalte, soo dangge merr aach. Off gut Deutsch: „So tanken wir auch.“ Nehm widder n Italiener und n Deutsche. Bein Italiener dauert die ganz Aktion ungfähr drei Minudde. Danggdeggel auf, Zapfpistol nei, draufgedröggt unn nei midd die teuer Brüh! Die Zapfpistol schalt ob, raus midd, Deggel zu, bezohlt unn ab. Die erschte drei Minudde senn bei uns genauso. Owwer in den Moment, wo die Zapfpistol obbschalt, gädds Drama beis „Danggn of Deutsch“ los. Weil die Euro-Anzeige off 76,68 € stätt, hässds im wahrsten Sinn des Wortes Fingerspitzengfühl beweis. Hochkonzentriert gugge zwee deutsche Aache of die Anzeige unn beobachte, wie die Cents gaanz langsam hoch zuggeln. Ee Dröggerle zuviel unn merr sidd 77,02. Widder a Dröggerle. Mist! 77,06. Noch amoll. 77,12. Off eemol vo die Zapfsäule naawedroo: „Erwin, dei Dangg lefft üüwer!!“ „Ich wääs, owwer ich muss noch weenichstens of off 77,20 € komm!“ Unn dann gehn merr nei zu die Kass unn bezohle mit die Grediddkorrde! Mir senn scho a Volk!!! Servus, der Eustach.
|
