| |
In knabb zwee Woche isses soweit: die Fußball-Bundesliicha gädd widder los! Endlich! Owwer wenn merr sidd, wie doss heutzudooch alles obblefft, fräächt merr sich scho, wie merr sich jedes Johr widder fang lässt unn derre „Farce“ nooch rennt. In die weenichste Mannschoffde spielt üüwerhaupt noch eener vo die Stodt, derra ihrn Noome der Verein dreecht. In München kee Schuhbladdler, in Stuttgart kee Spätzlesesser, in Bremen kee Fischkopf. Annererseits: in Aabscht spielt aach kee Aabschter merr und in Borderf bis off een kee Bordfer. Also woss reeche merr uns üüwerhaupt auf? Und: Eintracht Frankfurt - 17 komme, 12 furrt. VfL Wolfsburg - 18 komme, 15 furrt. Und der Hammer: Fortuna Düsseldorf - 20 gekäfft, 14 zunn Deifel gejoocht! Alles nei een Soog, durchgschüddeld, neu verdääld unn los gädds widder. Olé FCB!!! Und wenn ich nochert in die Zeitung jeden Dooch vo doss Euro-Drama laas, denk ich: Stellt euch amoll vuur, a neuer Verein, sooche merr amoll Laurentia Wanne-Eickel, klopft noo die Tür vo die Bundesliicha und fräächt, ob er mitspiel döff. Die grösse Vereine wie Bayern München, Borussia Dortmund odder Schalke 04 frääche, obbs denn leistungsmäßig langt unn lässe sich die Verträäch vo die Spieler zeich. Die Laurentia zeicht wallich n Haufe Kondraggde mit richtig gute Spieler vüür und dodraufhie lässt merr den Verein mitspiel. Noochs ocht Spiel die Bilanz: ocht moll verlurrn, dovoo viermoll zweestellig. S stellt sich raus, däss alle Spielerverträäch, die merr vuur die Saison gezeicht hodd, gfälscht worrn unn die Spieler goornedd doo worrn. Logische Konsequenz, normalerweis: Naus aus die Bundesliicha!! Jetzt owwer die Euro-Lösung 2012: Laurentia Wanne-Eickel döff in die Bundeliicha bleib und däss die Laurentia weiter mitgspiel konn, müsse die Vereine, die bis jetzt in die Tabelle oowe droo stänn, jeder ihr zwee besste Spieler nooch Wanne-Eickel schegg. Vier Woche später noch zwee, drei Woche später noch een. Weil Laurentia trotzdem weiter verliert, noch schlimmer: die erschte drei grieche (Nomen est omen .......) jeder fönnef Punkte obbgezooche unn die 15 Punkte gricht die Laurentia. Vier Woche später noch je drei, drei Woche später noch amoll je zwee. Und so gädd doss die ganz Saison weiter. Bis zum 34. Spieldooch. Am Schluß iss so wie merrsch wollt: alle punktgleich! Undenkbar? Ächentlich scho. Servus, der Eustach. |
