| |
Wenn ihr doss lasst, iss entschiede, woss für a Gronbrinz demnächst als König Nachfolger vonn Dr. Weiß im Bayerische Landdooch würrd. Entweder künnt der neu Regent wie scho sellamoll der Hans Böhm vo Unslaawe odder unner Wahlkreis würrd ab 2013 vo die Haßberg aus regiert. Däss a Brinzenrolle zwor gut schmeckt, monnichmoll owwer ganz schöö im Mooche liech konn, merkt der Prinz Charles in England scho seit etliche Johr. 86 Johr alt iss sei Mutter, die Queen, unn scho seit 60 (!) Johr iss sie die Königin. Do worrn n Hans Böhm sei 30 Johr im Landdooch jo direkt weenich! Mich reut der Prinz Charles jeden Dooch mehr und er hodds jo wallich nedd leicht. Jeden früh weggt er auf, guggt nein Spiegel unn sieht nix wie Ohrn! Und dann, wenn er ins Bood fertig is, sieht er sei Camilla und guggt widder domm. „Mach nedd so a Gsicht!“ seecht sie no. Dodrauf hie der Charles: „Wenn ich Gsichter gemach könnt, hässd du scho lang a annersch!“ Frech, nä? Ja, so langsam muss merr sich Surche ömmn Charles mach. Ich well jo nix sooch, owwer ich glääb, däss der Charles irchendwenn amoll s Saufe oofängt. Heutzudooch saufe jo Berufsgruppen, wo mersch nie für möglich ghalte hädd. Ärzt, Inschinööre, Wissenschaftler – worömm nedd ach gfrustete Gronbrinzen? Odder Astronaute. Ja, aach Astronaute hömm reihenweis Alkoholprobleme! S iss oweer aach kee Wunner, wenn merr wääs, däss zum Beispiel die Weltraumstation ISS zum Jahreswechsel 16 moll oo een Dooch die Datumsgrenz üüwerfliecht. Doss hässd 16 mal Silvester feier, 16 mal Rakete nein Weltraum schiss, 16 mal „Prost Neujohr“ wünsch unn Sekt dazu sauf. Unn drei Russe midd in die Station! Woss gläbbst denn du, woss do abgeht! Noch die zwöllefd Runde seecht der Ami-Astronaut John zu sein Kosmonaute-Kolleeche: „Igor, fliech amoll rechts noo, ich konn nixmerr, ich muss amoll naus!“ Söll er amoll prowier! Unn für die drei Russe isses aach nedd leicht. Welle die Ami onnder n Diisch sauf, schaffes oower nedd - weeche die Schwerelosigkeit! Ja, und so hodd halt jeder Mensch – ob off die Erde odder ins All - sei ganz bersönliche Probleme. Die CSU bei uns hodd ihrsch jetzt gelöst. Doss hodd ihr Kandidat n Prinz Charles halt voraus: er muss nur worrd, bis der König ins Maximilianeum die Lust verliert und nedd däss die Mutter midds ewig Leben n Löffel mitsamt die Krone waggleecht. Servus, der Eustach. |
