| |
Däss die Landkreis-Gebietsreform, wo die drei Landkreise Neuscht, Mellerscht unn Könnshofe 1972 zu „Rhön-Grabfeld“ zommgeleecht wurrn senn, scho widder 40 Johr her iss, söllt merr nedd meen. S iss owwer wallich so, unn so lasst merr in derra Dooch etliche Artikel drüü, wie doss domols alles woor. Merr sidd aach in farbige Bildlich schöö, wie die drei klenne Landkreise domols ausgsenn hömm und wer zu wen ghört hodd. Ich behaupt jo ömmer, däss zwösche Bastheim/Simonshof unn Önnerelsbich a Sprachgrenz verlefft. Und jetzt wääs ich aach, worömm doss so iss. Weil der ganz Besengau domols zu Mellerscht ghört hodd unn der Altlandkreis Mellerscht domols wie a Soog in n Landkreis Neuscht nei ghängt woor. So a Oort Gazastreifen halt. Önnerelsbich wor domit sprachlich nooch Osten hie komplett obbghängt und so hodd sich dürrt halt a ganz spezieller, deutlich Rhöner „Släng“ ausgebildt. Und wie hömm die zwee klenna Landkreise domols bei die Kreistoochswohl n grössa Landkreis Neuscht ausgschmiert! Weil se nur ihr äächene Kandidate gewählt hömm, hadde se innen Kreisdooch die Mehrheit unn aach der erscht Landrood vo Rhön-Grabfeld woor nedd vo Neuscht, sondern vo Könshoofe. Und däss sich Gschichte laut Karl Marx bekanntlich wiederholt, sidd merr jetzt oo die Windkraft. Heftig genn die Leserbriefe Pro unn Contra hie unn her unn ville Leut passts nedd, däss die Touriste nei die Hochrhön, die Windräder owwer mehr nooch Osten ins Grabfeld sölle. Nedd nur däss doo (Aabscht!) vill geraucht würrd unds wohl später, wenn die Windräder stehn, bei Ostluft in die Rhöö aus die Steggdose noch Zigaratteraach stinkt. Na, na, noch viel schlimmer! Derre Grabfelder würrd bewusst wärrn, däss sie die Hochrhön, wenn alles so künnt, wies jetzt aussidd, energiepolitisch voll im Griff hömm! Wenn Grafenrheinfeld vom Netz iss, und der Strom no jo praktisch nur noch durch die Windkraft im Grabfeld produziert würrd, langt ein Griff zum berühmte grösse Schalter, unn in die Rhöö würrds dunkel! Von weechen Lichtstuuwe und so – wenns die Strombonze ins Grabfeld, jeder mit mächtige 5 Hektar Wind ömms Haus, wella, gädd in die Rhöö goornix merr! Ee Sitzung vo die GWEB („Grabfelder Windenergiebehörde“), unn in Schmolwasser setze die Leut midd die Petroleumfunzel ins Wohnzimmer unn gugga Fernsehen! Böse Aussichte. Servus, der Eustach. |
