| |
So genannte „Schildbürcherstreiche“ gidds bekanntlich üüwerool off die Welt unn do könne mir do bei uns in Rhön unn Grabfeld jo wohl kee Ausnohm gsei. Ich hobb amoll a boor schönne Beispiele aus die jünger Vergangeheit gsammelt. Nummer 1: In Wechterswinkel hodd der Landkreis n grösse neue Parkplatz läss bau. Däss die ville Besucher voss Klössder Platz für ihr Auto finne. Jetzt hodd merr festgstellt, däss a bestimmter Dääl vo dann Parkplatz wohrscheinlich nie genutzt wäär konn, weil größe Pappel-Baame drömm römm stänn und Äst ro gfall könnte. Iss owwer aach schwer mit soon Parkplatz. S iss kee Hochbau und aach kee Tiefbau. Also praktisch keener zuständig. Die Bauarbeiter gugge beis Baue nerr bloß noowärts und erscht wennse fertich senn, aufstään und middn Blick gen Himmel n Herrgott danke, däss die Bloocherei endlich fertig senn, sehn se die mächtiche Pappel, owwer dann isses zu spät. Nummer 2: Die gebloont Videoüberwachung vom neue Busbahnhof in Neuscht. Wenn eene vo die ocht Kameras merkt, däss a Gruppe länger wie fönnef Minudde zomm städd, würrd middn Lautsprecher dazu aufgfordert, sich sofort aufzulööse. Do sooch ich scho jetzt vurraus: a Senioren-Ausflug würrd vo dann neue Busbahnhof nie starte. Die senn für gewöhnlich jo scho a hallwe Stonn vuur die geblonnt Abfahrt do und müsste sich dann, weil die Kamera dezu auffordert, sechsmoll in derra halb Stonn auflös und sich n neue Platz süch. Undenkbor! Und Nummer 3: In Müürscht gaabs a boor Johr lang oos ööwer Duur a Ampel, ömm derra ihrn Sinn unn Zwegg gstritte wurrn iss. A Behördenleiter vo Kissinge hodd no vuurgschloocha, sie obzuschalte. Wie sie, die Ampel, amoll kabudd gewassd wär, hädd der Verkehr genauso gut funktioniert, wie mit die Ampel. Den Herrn sölld merr amoll noch Neuscht schegg, odder? Owwer zurück zu die Ampel in Müürscht. Merr hodd se nedd obgebaut, sondern dünne Sperrholzbreddlich vuur Rot, Gaal unn Grün gschoowe. Unn doss jetzt scho monatelang. Doss wär genauso, wenn mir heut oowerts nei unner Schloofzimmer gänn, s Licht brönn lässa unn no schworz Isolierband ömm die Lampe weggeln, däss merr eigschloff könne. Servus, der Eustach. |
