| |
Jetzt muss ich mich doch wallich scho widder mit unnern Herrn Landrood befass und well amoll so oofang: Wie ich sellamoll als junger Kerrl middn Gotthold zomm s Mussigspiele gelernt hobb, hadde mir n orch rührige Mussigvereins-Vuurstand, der uns ömmer widder wöss läss wollt, wie wichtig s Üüwe iss. Ich höörsch noch wie heut, wie der Korl - so hodd der Vuurstand ghässe - in eener Duur gsocht hodd: „S Üüwe iss s wichtichst A unn O!!!“ Ganz elegant woor doss zwor nedd ausgedröggt, owwer mir hömm genau gewösst, woss uns der Korl sooch wollt: S iss wichtig, dess merr in sei Laawe, egal ömm woos s gädd, „Brioridääde“ setzt, wie merr Neudeutsch dazu seecht. S Normalst also vo die Welt und jeder Mensch mit gsonnde Menschenverstand wääs, woss Brioridääde senn und desses orch sinnvoll iss, sich danooch zu richte. Und grood vo hochgstellte Persönlichkeide, wie’s unner Landrood zweifellos eena iss, söllet merr meen, däss die noch dem Brinzib vuurgänn. Owwer do laas ich doch neulich vo a Sitzung in die Zeitung, woos ömm die maroode Kreisströsse gange iss. CSU unn SPD hömm den glorreiche, unerreichbor guude Vurschlooch gemocht, doch eewa so a Brioridääde-Liste aufzustelle, wenns drömm gädd, zu entscheide, in woss für a Reihenfolge die Ströss gebaut odder hergericht wer sölle. Der Landrood wäär begeistert gewassd und hädd den Vuurschlooch als „eine sehr gute Anregung“ gfonne. „Holla, die Waldfee!“, hobb ich gedocht. „Der Landrood find die Idee vo a Brioridäädnliste gut?“ Und gleich iss mir die Reechel vom Umkehrschluss eigfalle. Hädd er sowoss amennd bis jetzt noch goornedd ghood??? Doo wunnerts mich nedd, wenn für 2012 bis jetzt nerr blooß der Ausbau vo die „Magistrale“ zwösche Mellerscht unn Sonnde/Grabfeld eigebloond iss. Obwohl die Gäulsfuhrwerke, die do forrn, jo aach ohne Neubau odder Ausbesserns gut durchkomm müsste. Unn die berühmt-berüchtigt, dringend noodwendich und sinnvoll NES 20 zum Erreiche voss Rhön-Glinnigum unn zur Entlastung voss gebloochd Herschfeld künnt nedd! Owwer ich wääs scho, wie Landrood unn Konsorrdn denke: In a Ströss, woos goornedd erscht gidd, könne später aach kee Löcher dinn gsei, die merr für vill Geld widder zu mach muss! Hund senns scho ins Landrootsamt, nä? Servus, der Eustach. |
