| |
Weil merr heut Faschings-Diesdich hömm, nahm ich mir heut amoll die Freiheit, oo derra Stell n schönna Witz zu verzehla. Drei Schreiner worrn gschdurrwe – eener vo Ööwereßfeld, eener vo Löhredd unn eener vo Sonde/Rhön - und stande jetzt zomm vuur s Himmelstor. Der Petrus iss raus komme und woor goornedd so unglücklich drüü, däss drei Schreiner do worrn. S hölzern Himmelsduur woor nämlich kabudd und so senn die drei Schreiner n Petrus gaadlich komme. Als erschtes hodd der Petrus n Löhredder oogesproche unn ihn dazu aufgfordert, für’s Richte vos Himmelsduur a Angebot obbzugaawe. „300 Euro“, hodd der Löhredder Schreiner gsocht. „Gut, iss in Ordnung“, hodd der Petrus gemeent und als nächstes n Eßfelder Schreiner gfräächt, wie denn sei Angebot wär. „700 Euro“, woor die Antwort vo dann Grabfelder Holzmechaniker und do hodd der Petrus scho amoll noochgfräächt: „700 Euro? Doss iss jo mehr wie dobbeld soviel wie s günstichst Angebot, doss ich bis jetzt gricht hobb!“ „Ja“, hodd der Eßfelder Schreiner gemeent, „ du musst scho versteh, Petrus, alles iss teurer wurrn und mit 700 Euro für euer liidschäftichs Duur komm ich grood so hie!“ Gut, hodd der Petrus gemeent, frääch ich halt dann Sondemer Schreiner aach noch. „Wie sieht’s aus, Rhööner Holzwurm, woss muss ich denn bei dir für doss Duur recher?“ Der Schreiner hodd nedd lang üüwerleecht unn forsch oogeboode: „3.000 Euro!“ „Woos???“, hodd der Petrus völlig üüwerrommbeld zurück gfräächt: „3.000 Euro??? Doss iss jo Wucher! Wie künnst denn du off 3.000 Euro?“ Genüsslich hodd sich der Sondemer Schreiner zunn Petrus vüür gebeucht unn salbungsvoll gemeent: „Wässda, Petrus. Doss iss ganz eefoch. 1.000 Euro für dich, 1.000 Euro für mich, den Eßfelder Schreiner geewe merr sei 700 Euro widder und den Löhredder lässe merr doss Duur für 300 Euro mach!!!“ Domit hädde se also „gewulfft“, wie merr zu sowoss in Anspielung off unner seid Freidich Ex-Staatsoowerhaupt neuerdings seecht. Jetzt bin ich nerr froh, däss unner zukünftiger Bundespräsident nedd Leutheusser-Schnarrenberger hässd! Süsst müsst merr sooch, es hodd jemand „geleutheusserschnarrenbergert“. Owwer läss vo den Därmel vo Noome „Leutheusser“ unn „berger“ weg, wos bleibt? „Schnarren“. Und wenn merr no seecht, es hodd jemand „gschnorrt“, senn merr doch widder bei die Leut, odder?! Servus, der Eustach. |
