| |
Kaum zu glääwe woor für n Gotthold unn für miich, wie merr neulich in die Zeitung gelassd hömm, däss die Durissde, die zu uns in die Rhöö komme, midds Esse bei uns nedd zufriede wärrn. Es geht also ömm die „Kulinarik“, woss nedd etwa die Lehre vo die Kugelschreiber iss, sondern neudeutsch alles beschreibt, woss midds Esse unn die Kochkunst zu tun hodd. Kulinarisch wär bei uns a Umfrage nooch also nedd viel geboode. Merr hält’s nedd für mööglich, odder? S gidd n Kreuzberg unn etliche Stüblich, wo du herrlich Brotzeit gemach konnst, vo die ville annere Wirrtschoffde und sogoor Feinschmegger-Restauraunts ganz zu schweiche. Unn die Gäst werrn nedd zufriede? Off die anner Seite muss merr sich amoll in die Looch vo en hessische Durissd versetz, der sich unnern Landkreis vo Gersfeld her üüwer die Schwedenschanze nähert unn mit sei Fraa ausgemocht hodd, oo die erscht best Wirtschoffd zu halte, die direkt oo die Ströss licht. Fohrt mit mir die Stregg amoll in Gedanke obb, bis die erscht Stell künnt, wo du woss zu esse grichst. Oberweißenbrunn, Frankenheim unn Bischofsheim zähle nedd, weil unner hessischer Durrisd doo goor nedd nei künnt. Doss hömmer jetzt vo unner ville Umgehungsströsse! Ower Gott sei Dank gädds jo in Wegfurt noch midde durch ……. Pfäufedeggl! Links am End künnt zwor der Gasthof Ewald, unner Durrisd hält freudestrahlend oo, stellt dann owwer fest, däss der Ewald zuu hodd. Weiter gädds. O Schönau, Brend unn Neuscht vorbei dann endlich der erscht Stop. A Wirtschoffd? Denk nedd droo - die neu Ampel oo die Geis-Kreuzung, die owwer jo bekanntlich leider nedd bewirt’ iss. Also weiter üüwer die Brögge nauf noch Rödelmaier, droo vorbei, bis in Wülfershause links die berühmst Friedhofsmauer von Landkreis künnt. Schöö, owwer – wie jede Friedhofsmauer - unnütz wie a Groopf: die wo dinn senn, könne nixmerr raus unn die wo noch dause senn, welle nedd nei! Doss nur am Rand. Die hessische Mooche knurre nooch jetzt fast 40 km scho bedenklich laut, bis in Saal endlich Rettung naht. Links, gleich nooch s Ortsschild isses endlich so weit. Der Düring? Fast. Owwer die Rettung gidds scho a boor Meter vuurher. Blaues Schild mit weißer Schrift unn die vier berühmte Buchstuuwe A, R, A und L. Nei, zwee Mars unn a Literflösche Cola gekäfft. Unn schnell widder zurück neis hessisch Paradies. Schlimm, odder? Servus, der Eustach. |
