| |
Jetzt senn mir widder in die Zeit, wo scho kee Weihnochte merr, owwer Fosenocht aach noch nedd so richtig iss. Mer beweecht sich irchendwie unsicher zwösche „Schönne Feierdeech“, „Guten Beschluß“ unn „Helau“ unn wääs noch nedd so richtig, ob merr scho lustig odder doch noch liewer weihnochtlich besinnlich sei söll. „Weihnosenocht“ könnt merr die Zeit genenn. Owwer bevuur mir jetzt widder alle bierbeseelt in die Fosenocht nei rummbeln, muss ich doch noch amoll off n Heilige Oowerts zurück komm. Woss oo soo einen hochheiliche Dooch in nerr bloß vier Stonn off dich eiströömt, doss gädd off kee Ochs- unn kee Eselshaut. Owwer der Reih nooch. 12.10 Uhr. Radio, Antenne Bayern. Woor zufällig droff, weil normal gidds für mich und n Gotthold jo nur Bayern 1! 12.10 Uhr also, Antenne Bayern, Weihnochtsgrüß vo Brominende. Ich denk, ich höör nedd richtig! „Libbe Zuhörer. Ich wunsche ihnen allen frohe Weihnachten, ihr Vitali Klitschko.“ Er! Grood er! S ganz Johr die annere Leut of die Maske haab unn nochert frohe Weihnochte wünsch, hä? Dann, 12.30 Uhr, ich foohr für‘s letzt Weihnochtsgschenk in Neuscht zunn berüchtigste aller Medien-Märkte und hör FFH! Hessen-Funk! Und wos mache die? Verloose a „Wii“, unn die söll noch am sellwe Dooch bis zu die Bescherung rechtzeitig frei Haus geliefert weer. Gewonne hodd a Fraa vo Rüdesheim. Glück ghood, FFH! Stellt euch amol vüür, s weer jemand vo Zimmeraa durchkomme und hädd gewonne. Von weechn „Wird bis zur Bescherung noch frei Haus geliefert.“. N Wolf hädd ihr euch vo Frankfurt nooch Zimmeraa gfohrrn! Und der Höhepunkt: Ich n heiliche Oowerts n 12.40 Uhr im Ich-bin-doch-nicht-blöd-Markt! Die Hölle! Hunderte Leut, Schlangen oo die Kasse, du hossd gedocht, s iss der letzt Dooch! Oo die Kass wünsch ich der Kassiererin „Schönne Feierdeech!“, gidd sie zur Antwort: „183 Euro, 60.“ Die hodd mich scho goor nixmerr wohrgenomme. 183, 60 woor die Rechnung vom nächste Kunde! Unn dann. Gedenkminute. 16.15 Uhr. Ab dem Moment woor der ältst, lewenndich, noch aktiv Schauspieler und Entertainer der Welt der Thomas Gottschalk. Der bisherig Rekordhalter hodd mit 108 n Löffel wagg geleecht. So ein Tumult in nerr bloß vier Stonn! Unn dann sösst du entspannt, ruhig unn gelööst in die Bescherung gäh?! Ich bin froh, däss jetzt die Fosenocht künnt! Servus, der Eustach. |
