| |
Gfühlt 25 mal würrd ins Fernsehen offs vergange Johr zurückgebliggt unn ich hobb doss jetzt aach amoll gemocht. Zwee Noochrichte worrns, die mich 2011 förmlich vom Hogger geressa hömm:
1. Die Stefanie Hertel unn der Stefan Mross hömm sich getrennt und 2. Der Almabtrieb in Ginolfs midd unnern Landroot iss obbgsocht wurrn.
Do iss jo die Euro-Krise a Dreeg degeecha. Unn wer worrn mei “Menschen 2011”? Quer üüwer Deutschland verdääld hobb ich sa gfonna – vo Berlin üüwer Wollbich unn Mellerscht bis Hamburg.
Nr. 1: Der derzeit erfolgreichst Bergsteiger vo die ganz Welt. Doss iss zur Zeit zweifellos a Fraa unn die hässt Angela Merkel. Unerreicht, woss die (sich) geleist hodd: Vier Gipfel in drei Woche! Unn woss fürre! Alles ausnahmslos Gipfel des höchsten Schwierigkeitsgrads.
Mei Nr. 2: Die furchtboore, ääh, fruchtboore Einwohner vo Wollbich. Von weechn die Rhön stirbt aus. Normalerweis hömm mir jo a Geburtenrate klenner wie die von Vatikan. Unn doss well woss häss! Owwer Wollbich?! Höchste Geburtenrate bezooche off die Einwohner in ganz Unterfranken! Do gädd woss bei die Saandhoose!
Nr. 3: Helmut Schmidt, unner Altbundeskanzler. Während der Papst scho oogezächt würrd, weil er nedd oogschnallt durch Freiburg zuggelt, döff er, der Helmut Schmidt, ins Fernsehen rauch wie er will. Ganz nach dem Motto: „Woss stört mich der Jauch, wenn mirs schmeckt, well ich rauch!“
Mei Nr. 4: Eberhard Streit, Bürchermässder vo Mellerscht. Nedd so viel Kinner wie Wollbich, owwer drei Baustelle pro Einwohner. Unn die Aktione! Anbaggern auf der Baustelle, Frühstück auf der Baustelle, Wahl „Mister Baustelle“ und und und! Wos mache die bloß, wenn nixmer gebaut würrd? Do iss jo nixmer los!
Unn schließlich mei Nr. 5: die Mitarbeiter vo „Standard & Poors“. Hömm die Bonität vo Frankreich zurückgstuuft, weil aus Versehen a E-Mail verscheggt wurrn iss, die middn entsprechende Text für alle Fäll scho amoll gschriewe woor. S sellwe wäärsch, wenn a junger Kerl sei Freundin a SMS schegged, wo dinn städd, däss er mit ihr Schluß mach well. Unn wenn die Freundin no in Tränen aufgelöst ooruft und fräächt, woss doss söll, seecht er, doss wor a Versänn, er wollt die SMS gornedd schegg, sondern er hattse nur für alle Fäll scho amol gschriewe unn in sei Handy gspeichert. In diesem Sinne: Guten (Be)schluss. Servus, der Eustach. |
