| |
Monnichmol schlöösde die Zeitung auf, lasst woss, unn denkst: „Doss konn doch nedd gsei!“ Ein Zeuch gidds! Jetzt hodd doch tatsächlich a Moh vo Dortmund n Papst oogezächt, weil der bei sein Besuch in Freiburg nedd oogschnallt woor, wie er midd sei Papamobil durch die Stodt gforrn iss. Merr sölls doch nedd für möglich halt, odder? Off die Idee musste erscht amoll komm! Die Anzeige iss midd die Begründung obgelehnt wurrn, däss diejenich Ströss zu dem Zeitpunkt gsperrt woor unn der Papst bzw. sei Fohrer nerr bloß Schrittgschwindigkeit gforrn iss. „Iss in Ordnung“, hodd der Gotthold gemeent, „brengt mich owwer of a Idee. Wenn ich s nächstmoll vo die Wirtschoft hemm fohr, unn mir nedd ganz sicher bin, ob ich noch fohr döffet, zuggel ich mit Schrittgschwindigeit durch n Wald off n gsperrte Forstweg. Wenn mich no die Bolizei oohalt well, lehn ich mit Hinweis off n Papst sein Bräzedenzfall ab unn kutschier eefoch weiter. Schließlich iss die Ströss gsperrt unn ich fohr bloß Schritt.“ Owwer s gidd noch mehr, woss merr eefoch nedd verstäh konn. Zum Beispiel döffe ehrenamtlich däädiche Bürchermässter, Bundes- unn Landtagsabgeordnete, Minister unn sogoor der bayerisch Ministerpräsident so alt sei wie sa welle, ömm gewählt weer zu könne, für hauptamtliche Bürchermässter unn Landrät iss ower mit 65 scho Schluß. Vom Papst ganz zu schweiche, weil do scheints jo ährer a Altersgrenz noch unnde zu gaawe. Wenn du nedd 80 bisst, konnste doss erscht goorned wäär. Do käm jo – rein altersmäßig - goor der Johannes Heesters mit sei 108 Jöhrlich noch in Frooch. Papst Johannes, der 24ste. Hööred sich aach noch gut oo. Gädd owwer nedd, weil der Heesters jo „Wetten, dass …..“ üüwernimmt. Für FIFA-Fußballschiedsrichter hingeeche iss mit 45 scho Schluß, wobei die owwer jo schließlich mehr laff unn besser seh müsse wie der Papst. Merr hodds nedd leicht. N Gotthold hömmse neulich übrigens medda in die Nocht oogehalte. „Wo wollen Sie denn hin?“ hodd der Bolizist gfräächt. „Ich bin offn Waach zu n Vuurdrooch üüwer Alkoholmissbrauch, die Auswirkunge offn menschliche Körper unn die Einflüss durch Rauches unn zu späts Hemmkomme.“ Erstaunt hodd der Herr Bolizist zurück gfräächt: „Wirklich? Wer hält denn um Gottes Willen jetzt mitten in der Nacht um 2 Uhr noch einen solchen Vortrag???“ Do drauf der Gotthold ganz drogga: „Mei Fraa!“ Servus, der Eustach. |
