| |
Do hömm die Rhöner Handwerker owwer der Rechierung in München amoll gezeicht, woss a Harke iss! S berühmt-berüchtigt und vill disgudierd „Grüne Klassenzimmer“ woor so schnell fertig, däss nedd amoll Zeit dafür gebliewe iss, a Betreibergsellschoffd zu gründe! Der Alban Schmitt, die RST, der Weisenseel, der Karl Schmidt unn alle annere düchdiche Handwerker hömm soo orch nei die Rhöner Händ gschbätzt, däss doss legendäär Bauwerk scho kurz noochn Spatenstich fertig woor. Do sieht merr widder amoll, wie schnell merr gemauer konn, wenn mer nedd ömm die Eck römm muss! Owwer Spaß beiseite: jetzt würrds jo hoffentlich bald gelinge, die Betreibergsellschoffd zu gründe unn no geht’s rund! Owwer wos mecht merr midd den sündhaft teure Bau, bis es soweit iss? Doss konn merr doch nedd eefoch leer läss gstääh! Ich hobb merr amoll Gedanke gemocht. Weil der Rundbau vo die Furrm her wie a mürbs Hürrnla aussieht, könnt merr üüwergangsweis a Großbäckerei nei geläss, die exglussiv fürrn ganze Landkreis ausschließlich mürbe Hürrnlich backt. Alternativ dozu könnt der elegant Bau als Keechelbooh genützt weer. Doss wär a ganz neus Keechelgfühl, weil derjenich, der die Kugel schiebt, durch die Rundung nedd sieht, wo die Keechel stänn. A Attraktion weersch allemoll! Keecheln ömm die Kurve römm – Alleinstellungsmerkmal der Rhön! Und wenn alle Strick reiße, unn s Grün Klassenzimmer gädd doch nie in Betrieb, die ultimativ Lösung: merr worrd noch 200 Johr, baut auße n Gang midd a Geländer ömm den Bau und stellt dinn die letzte lebende Rhöner aus. Nur vo auße duch die Fensterscheibe zu beobachte. Wer doch gelacht, wenn sich nedd der ee odder anner Nichtrhöner oo a gstannene Rhöner Fraa vo die Ausstellung interessier dääd, unds midd uns Rhöner doch weiter ging. Und ömm noch amoll off die Rundbauweise zurück zu komme. Bei uns ins Durf hodd jetzt aach a Familie a Haus midd lauter runde Zimmer gebaut. Alles rund, jedes Räumle, kaum zu glääwe. Und alle hömmse den stolze Bauherrn gfräächt, worömm in Gotts Wille er sich denn a Haus nerr bloß mit runde Zimmer gebaut hodd. „Ganz eefoch!“, hodd der guud Moo gsocht. „Wie mir mei Schwiegermutter eröffnet hömm, dess merr a Haus bau wella, hodd sie gsocht: „Woos, ihr baut? Doss iss jo prima! Do würrd sich doch für mich aach a Eckle dinn finne?!“ Servus, der Eustach. |
