| |
„“B.u.B.-Logistik“ - wos söll denn doss bedeut?“, denkt jetzt sicher der eeh odder anner. Ganz eefoch. „B.u.B.“ steht für „Buß- und Bettag“, wie merrn jo murrn widder hömm. Unn eewa der Buß und Bettag iss a Dooch, der jedes Johr eine Riesen-Logistik in Gang setzt. Der Buß- und Bettag iss nämlich eener vo die weeniche Dooch im Johr, oo denne kee arbeitsfreier Feierdooch iss, annererseits owwer schulfrei. Unn do spiele sich no Dinge ob, wie ich se euch jetzt amoll beschreib will. Nammt amoll folchendes Szenario oo: a Familie lebbt mit drei Kinner (1., 2. unn 3. Klass) in Wegfurt. Die Oma (die Mutter vo ihr) wohnt 36 km weg in Irmelshause. Vodder unn Mutter senn berufstätig, äär bei die Siemens in die Staubsauger, drei Schichte, sie jeden Dooch vo 8 – 12 Uhr bei’n Tegut in die Neuscht. Wenn’s ömm ganz normale Ferien gädd, stellt sich die Familie drauf ei unn die Oma wohnt zeitweis in Wegfurt. Owwer wenn no ee so a unregelmäßiger schulfreier Dooch wie der Buß- und Bettag künnt, brecht alles zomm. Der Vodder hodd Frühschicht, föhrt normal n viertel sechs dehemm furrt unn iss kurz noch halwer sechs bei die Siemens. Soo owwer föhrt er scho n dreiviertel Fönnef bei Nocht unn Nebel (schließlich iss Buß- unn Beeddooch ömmer inn November) noch Irmelshause, ömm die Oma zu hole. 20 noch Fönnef isser inn Milzgrund, die Oma steicht ei, no gehts zurück Richtung Neuscht. Ungfähr zeitgleich föhrt die Mutter in Wegfurt los, öm 20 Minudde später in Neuscht off’n Siemens-Parkplatz die Oma zu üwernahme. Der Vodder gädd säumüüd oo die Ärwet, die Oma würrd hemm off Wegfurt g’forrn. Die Mutter schafft no vier Stonn bein Tegut, dann gädd der ganz Zirkus rückwärts los. Oma zurück zunn Siemens-Parkplatz, der Vodder künnt obgschafft raus unn föhrtse hemm off Irmelshause. Bilanz: weechn Buß- unn Bettag woor der Vodder üüwer a Stonn länger unterweechs wie normal unn insgsamt senn zusätzlich 120 km mehr gforrn wurrn! Ökologisch unn ökonomisch also zweifelhaft, ökumenisch ehrer von Vorteil, denn die Oma iss als Irmelshäusere evangelisch und hält vill off‘n Buß-und Bettag. Do muss no eewa entsprechender logistischer Aufwand getriewe wäär! Und insgsamt gilt wie so oft: Nomen est omen. Buß- und Bettag. Du büßt, dässes a Feierdooch unn gleichzeitig schulfrei iss und du betst, däss logistisch alles gut gädd! Servus, der Eustach. |
