| |
Gwelle-Kaddalooch – dos is aach widder ees vo die Würrder, wo mer of n Tood erschreckt, wenn mer sa soo schreibt, wie mir sa reeda. Erschrogga bin ich aach jetzt, wie ich in die Zeitung gelasst hob, däss s Land Bayern die Firma Gwelle bei ihr’n neue Herbst-/Winter-Katalog onterstützt. „Stell dir amol vuur“, hob ich zum Gotthold g’socht. „du bist vor a poor Monet ausg’stiecha, worscht für a dreiviertel Joohr in Australien, hast keen Kontakt noch Eurobba, kee Noochrichta, kee Zeitung, kee gornix, fliechst zurück noch Deutschland und siehst of’n Flughafen in a Zeitung die Schlagzeile „Bayerische Staatsregierung unterstützt Quelle beim neuen Herbst-/Winter-Katalog“. Dos hässta doch nie für möglich g’halte, odder?“ 20-25 Millione Euro kost’s Drucka vo so’n Kaddalooch und weil Gwelle mit sei Mutter Arcandor pleite gange iss, musst jetzt der Bayerisch Staat bürg, süsst wer der neu Kaddalooch net gedruckt wurrn. Und wos dos für Folge hätt!!! Der Druckerei in Nürnberg wärr’n 20-25 Milliona Euro Umsatz flöten gange. Die Drucker hätte kee Geld mer, könnte sich kee Wurscht, kee Broot und kee Bier mer gekäff und in Nürnberg wär’n dodrauf hie sämtlicha Metzger, Bäck und Bräuereie hobbs gange. Weil dos so wär, hätt sich üüwerhaupt keener mer wos zu Essa oder zu Trinka mehr könn käff, weil’s jo kee Metzger, Bäck, Bräuereie etcetera mer gabb dääd. Weil die Leut in Nürnberg nixmer ess und trink dääda, müssta se ach nixmer of n Abort. Die Kläranlage dääda ausdroggel und sämtliche Kläranlage-Arbeiter göhngede nei die Arbeitslosigkeit. Eine Lawine wär loosgedraade und die Wirtschoft in ganz Nürnberg dääd letztlich zommbrech, bloß weil’s keen Gwelle-Kaddalooch mer gab dääd. Für die Männer in ganz Deutschland wär dos annererseits gornet so schlacht. Aus n Kaddalooch, dan’s net gitt, konn die Fraa schließlich aach nix bestell! Der Deifel is bloß, däss s jo ach noch Neggermann, Oddo, Baur, Schwab und wie sa noch alle hässa, gidd. Ower wer wääs, vielleicht komma die jo ach noch in Schwierigkeide und könnte keen Kaddalooch mer gedruck. Ower no gitt’s jo noch dos blööd Internet zum Bestella! Dann well der Gotthold noch Indien auswander. „Woröm denn dos?“, hob ich g’fräächt. „Ganz eefoch“, meent er: „A jeder künnt nei’s Internet, a jeder – blooß die Inder nedd!“ Servus, der Eustach. |
