| |
So richtig hömm der Gotthold und ich den Schogg, däss der Bernd Weiß irchendwenn amoll nixmerr für uns in‘n Bayerische Landdooch setz söll, noch nedd vergroffd. No ja, bleid ihn zumindest die horrd Obbosidsionsbaank erspoort, wenn in zwee Johr der Christian Ude als SPD-Ministerpräsident nooch gefühlte 200 Johr CSU-Regierung s Zebbder in Bayern üüwernimmt. Woss bis jetzt noch keener so richtig geraffd hodd, iss die Macht, die der Bernd Weiß in München und Berlin daadsächlich ausgeübt hodd, ohne däss mir doss gemerrgd hädde. Deutschland iss nämlich nedd weeche die Kaddasdroof in Japan unn Fugguschiema aus die Atomkraft ausgschdieche, sondern weeche n Bernd Weiß sei Lebensbloonung! Unn doss koom so: Ursprünglich sollt s Kernkraftwerk Grafenrheinfeld goornedd dürrthie gebaut wär, sonder nooch Bahra. Grund: der Nooma Grafenrheinfeld woor viel zu laang unn zu kommbliziert unn Bahra hädd viel besser zu Noome wie Kalkar, Ohu odder Biblis gebassd. Sofort hodd der Dr. Weiß sellamoll sei Veto eigeleecht, weil er in Bahra wohn wollt unn eewa kee Kernkraftwerk in die Näh vo sei Dürrfla hobb wollt. Also iss nooch Grafenrheinfeld gebaut wurrn. Nuu hodd sichs jo bekanntlich ergaawe, däss sich der Dr. Weiß beruflich veränder well, sich midd Sagg unn Bagg unn sei ganz Familie in Schweiferrd niederläss unn Bahre somit n Buggel kehr well. 2015 well er vo Bahra nooch Schweiferrd ziech. Unn dessweeche - so iss mei Dheorie – hodd er sich heuer s Frühjohr oo unner aller Angela gewendt unn ihr sein Bloon eröffnet. Wenn er in Schweiferrd wohnt, söll s Kernkraftwerk in Grafenrheinfeld gfällichss aus sei, süsst bleiwed eer in Bahra. S Ergebnis kenne merr: Deutschland iss doodraufhie sofort unn hollderdibollder aus die Kernkroffd ausgstieche unn die orm Seel hodd ihr Ruh: S Angela hodd noochgaawe unn der Bernd Weiß hodd sich durchgsetzt. Er wohnt ab 2015 bei die Meebronnser unn im gleiche Johr würrd Grafenrheinfeld obbgschalld! Sowoss nenn ich Machtbollidigg! Owwer ömm noch amoll off die Noome vo die Kernkraftwerke zurück zu komme: mit Gundremmingen, Krümmel, Brokdorf unn vor allem Brunsbüttel senn doo im Vergleich zu Ohu odder eewa Bahra scho bööse Dinger dabei. Unn dess Greenbies so gern in Brunsbüttel demonstriert hodd – doss wunnerd mich im Nochhinein jo goornedd! Servus, der Eustach. |
