| |
Heutzudooch hodd mersch weder als Fußballer, noch als Gauner leicht, der off Bewährung frei iss. „Woss hodd denn dos ee mit doss anner zu tun?“ hodd mich der Gotthold ganz entgeistert gfräächt. Ganz eefoch. Seit die neu Saison gidds in die Fußball-Bundesliga a Firma, die für jeden Spieler nooch s Spiel ganz genau gsooch konn, wie viel Kilometer er gelaffe iss, wie oft er n Bool getroffa hodd, wie oft er sich gschnäuzt hodd unn wie viel Milliliter er gspätzt hodd. Gut, Letzteres vielleicht a weng üüwertriewa unn ach a bessla unabbediddlich, ower die Sach mit die gelaffene Kilometer für jedes Spiel stimmt. Vorbei die Zeite, wo sich a Spieler unbemerkt ausgeruh unn für sei vill Geld halt doch nedd ganz soviel gemocht hodd wie a annerer. Noch s Spiel würrd ihm genau erklärt, wie weit er gelaffe iss unn wenns zu weenich wor, setzts woss. Genau in die Zeit basst aach die Meldung, dässes für Gefangene, die off Bewährung frei senn, a neue eleggdronische Fußfessel geb söll, die wie a Navigationsgerät ins Auto mit GPS überwacht würrd. Do sitzt no also irchendwo eener in a Büro, hodd n Monitor vuur sich, un basst genau auf, wo jemand hie läfft unn wie er sich beweechd. Stell dir amoll vuur, der Gefangene of Bewährung iss Wallfohrer unn wallt mit die Könnshööfer off Vierzehheiliche. Üüwer 60 Kilometer oo een Dooch in ee und die selb Richtung! Woss gläbbst denn du, wie die Überwacher do rotiern! Die denka doch garantiert, der well abhau! In Amerika gidds a vergleichboors System, woss ooschlööd, wenn eener a bestimmts Ziel nöher künnt, wie er ächendlich döff. Stell dir amol vüür, die Weiwer komme of die Idee, solche Geräädlich für ihr Männer eizusetze. Jedesmoll wenn du nööher wie 50 Meter oo die Wirtschofft vorbei läffst, gidds dehemm in die Köche n Alarm! Ich sooch euch, die Welt wär nix mer schö. Weil merrsch grod vo Navigationsgeräädlich hadde. Kennt ihr scho n neueste Heesters-Witz? Der Johannes Heesters hodd sich a neu’s Navi gekäfft und a boor Woche nooch n Kauf fräächdn der Verkäufer, ob er denn mit sei Geräädle aach zufriede iss. „Ja“, hodd der Heesters gsocht, „zufrieden bin ich schon. Aber eines stört mich an dem modernen Gerät doch. Jedesmal, wenn ich mit dem Wagen an einem Friedhof vorbei fahre, meldet sich die Stimme des Gerätes und sagt: „Sie haben ihr Ziel erreicht!““ Gut, nä? Servus, der Eustach. |
