| |
Däss sich s Fernsehprogramm im Vergleich zu süsst dramadisch geändert hodd, brauch ich jo wohl keen zu verzehla. So bis vuur 30, 40 Johr worrn mir mit „Was bin ich“, „Ein Platz für Tiere“, „Daktari“ odder „Dalli-Dalli“ bestens bedient und richtig gut unterhalte. Bein Sport goobs in die Fußball-Bundesliecha n Freidich-Oowerts ee Spiel und n Sammsdich pünktlich ab 18 Uhr - exglussiev in die Sportschau - die restliche ocht Spiele. Schluss, aus, ferrdich! Von weechn wie heut ee Spiel n Freidich, fönnef n Sammsdich-Nochmiddooch, ees n Sammsdich-Oowerts, ees n Sonndich-Nochmiddooch und s letzt schließlich unn Gott sei Lob unn Dank n Sonndich-Oowerts. Doo dräästa jo durch! Und außer Fußball woor do nedd vill annersch oo Sport. N Sonndich in die Sport-Reborrdaasche ins zwedd Programm a bessla Reites vielleicht, a weng Leichtaddleedigg unn ab unn zu aach amoll Dischdennis. Ansonsten neer blooß Fußball. Unn heut? Wenn ich mit mei Kössdla amoll off Eurosport odder Sport1 komm, könnt ich mich ömmer widder drüüh amüsier: Schbigger-Werrfes, off Neudeutsch „Dart“ odder Poker middn Boris Begger! Korrdespieles ins Fernsehn! Ja gidds denn soowoss? Und wenn merr scho in Eurosport unn Sport1 Korrderei zeicht, worömm künnt s Bayerisch Fernsehen nedd off die Idee, amoll „Mau-Mau“, „Schnauz“ odder n züftiche Schoofkopf zu üüwerdrooche? Doss weersch doch! Wenn die Leut scho nixmer nei die Wirrdschoffd genn, ömm zu korrda, könnte se sich‘s doch vo dehemm aussn Fernsehsessel raus oogegugg, wie die grüü Sau odder die Schöll-Ass geruffe wääred. Odder wie eener mit zwee Ööwer n Beddel spiel unn trotzdem gewinn dääd. Unn bau die Idee weiter aus: „Schworrzer Bäddr“ live ins Fernsehen! Du sisst, wie der berüchtigt schworrz Bäddr voo een Mitspieler zunn annere wandert und grichst dehemm feuchte Händ vuur lauter Aufreechung. Odder noch besser: „Ochs leech dich!“. Du konnst live ins Fernsehen bei a kühls Bier unn a Dudda Kardoffeldschibbs verfolch, wie zwee Spieler gleichzeitig Ächel sammeln, doss owwer nedd märrga! Unn wenn no der Ruf „Ochs leech dich!“ odder „Schloofkabbe!“ durch die Lautsprecher döönd, konnsta herrlich - wie die Bronnskorrder bein Schoofkopf in die Wirtschoffd - üüwer die Blöödel gezank, die wo die falsch Forb gsammelt hömm! Servus, der Eustach. |
