| |
Woss sich allerweil öggoloogisch bei uns beweechd, iss scho veröggd. Ob Haus odder Scheuer - s gidd fast kee Dooch in unner Dürrfer, wo nedd a Photovoltaikooloch droff iss. Unn ömmer mehr Leut speise nixmer alles in die Leitung ei, sondern verbrauche ihrn Strom sellwer. „Eigenverbrauch“ hässd doss Zauwerwurrt. Du nützt doss, woss die Sonn bei dir offs Dooch oo Strom gemocht hodd, sellwer unn grichst a noch Geld defürr. S Problem iss nur, däss du dann Strom genau in den Moment verbrauch musst, wo er gemocht würrd. S meiste logischerweis Middooch n 12 Uhr. Du müsst dei Eleggdroauto – schließlich gidds bei uns a Modellstadt für Eleggdromobilität - also genau dann auflood, wenn du’s ächentlich bräuchst. Wo doss hie führt? Die Leut mache freiwillig bloß noch Nochtschicht unn die Schwiegermutter würrd zukünftig vo Samstich off Sonndich nochts n zwee Uhr mit Kaffee besücht, der n Dooch vuurhar middoch n 12 Uhr gekocht wurrn iss. Und aach intressant: Passivhäuser! Doss senn die Häuser, die wo so gut isoliert senn, däss du üüwerhaupt kee Heizung merr brauchst. Die Zimmer in solche Häuser heize sich allee durch die Körperwärm vo die Leut, wo dinn wohne! Kaum zu glääwa! „Der Schuss konn owwer aach böös noch hinne los gegäh!“, hodd der Gotthold gemeent. „Stell dir amoll vüür, s iss Sommer, 35 Grad dause, du höggst in die Passivhaus unn hosst 41 Grad Fiewer. Woss gläbbsd denn du, woss du doo zusätzlich fürr a Bullehitz nei dei Wohnzimmer zauwerscht!“ Racht hodd der Gotthold! Odder nahm amoll oo, s iss tiefster Winter, minus 15 Grad daus, du höggst in die Köche, wisst bei gemütliche Wärm a Buuch laas, hossd owwer Schüddelfrossd! Von weechen wohliche Wärm! A Saukält hossda do in dei Passivhaus! Doss Ganze hodd owwer aach unbestrittene Vuurdeile. Von weechen Ärztemangel. Mir brauche kee Doktor merr. Die Kinner senn in so a Passivhaus jo braggdisch lauter klenna Heizkörperlich unn wenn die amoll krank senn, ruffst du eefoch die RGT oo! Do künnt no a Mondöör unn „repariertse“ widder. Odder wenn du zum Beispiel - rein körperlich - a weng a störrgere Fraa hossd, Besuch vo n frühere Freund grichst unn der dei Fraa noch nedd kennt. Wenn der fräächt, wer doss iss, unn off die Hedwich deut, seechst du eefoch: „Doss Dromm doo? Doss is mei Zentralheizung!!!“ Servus, der Eustach. |
