| |
Ächendlich denkt merr doch, däss a ganz bestimmte Leistung im Laawe grood dodurch zu woss Besondersch würrd, weil dosjeenich vill erscht gornedd schaffe.
Stellt euch amoll vüür, s iss Leichtathletik-Weltmeisterschoffd, Hochsprung der Männer. Die Latte würrd of grood amoll 2,20 m geleecht, alle springe logger drüü, die Zuschauer klatsche, die Reborrder üüwerschlonn sich ball, die Welt iss begeistert, alle hömm gewonne. Undenkbor odder?
So en ähnliche Eindrugg hadd ich in die vergangene Woche, wie ich - so genau wie vuurhäär noch nie - die Berichte üüwer die Ergebnisse vo die Abidurbrüüfunge bei uns in die Zeitung gelasst hobb. Erscht worrn jo die G9-ler droo. Mellrichstodt: 91 vo 91 gschafft. Könnshoofa: 66 vo 66. Müürscht: 71 von 71. Unn jetzt der Hammer! Neuscht: Bloß 106 vo 107 hömms Abi gschafft. Furchtbor, odder? Do fräächt sich doch jetzt der ganz Landkreis, wer wohl der dumm Hund ins Neuschter Gymnasium woor! Hoffentlich künns nedd raus.
Nochert s G8. Mellrichstodt: 64 vo 67 gschafft. Könnshoofa: 63 vo 64, Neuscht: 117 vo 119 gschafft. Unn widder die Müürschter: 66 vo 66 s Abi gschafft! Man lese unn staune. Grood Müürscht! Orm wie die Kirchemäus, Schulde bis üüwer alle zwee Ohrrn, owwer gscheite Kinner! Woss mir nedd ganz eileucht bei die ganz Gschicht iss die Daadsach, däss, wenn merr alles zommzeehlt, nerr bloß lommbiche 1,1 % durchs Abidur gfalle senn.
Zum Vergleich: bei die Jägerbrüüfung („Das grüne Abitur“) falle 15%, bein Angelschein 17%, unn bein Führerschein sagenhafte 25% durch!
Unn jetzt mei ganz bersöönliche Schlussfolcherunge doo draus:
1. S iss viel eefocher, s Abidur zu mache, wie n Fiisch zu fange.
2. S iss deutlich schwerrer, n Bock zu schissa, als durchs Abi zu komme.
3. Die Kinner vo heut senn zwor alle deoredisch blitzgscheit, owwer wohrscheinlich zu blöd, ömm Auto zu forrn.
4. In a boor Johr verhungert die Menschheit: sie fange keen Fisch merr, sie könne sich nix merr zu Essa gschiss, unn ömm nein Subbermarkt zu forrn unn sich woss zu Essa zu käffa, brauchste n Führerschein.
Und s allerschlimmst: in Neuscht (siehe oben) gidds jetzt jemand ohne Schulabschluß, der weder die Fischerei-, noch die Jäger-, noch die Führerscheinprüfung schafft. Owwer kee Surche. Der gädd wohrscheinlich nei die Bolidigg. In München im Landdooch würrd jo demnächst a Stell frei .............
Servus, der Eustach. |
