| |
Wie ich neulich in die Zeitung bei die Einweihung vo die neu Wollwicher Umgehungsströss n Dr. Weiß of’s Bild g’senn hob, hob ich zun Gotthold g’socht: „Hoffentlich wääs dos der Seehofer, süsst brönnt in München widder die Luft!“ Er hot jo neulich ganz schöö eena vo sei’n Chef g’fange, wie er sich erdreist hott, statt in München bei die Sitzung vo’s neu Kabinett zu bleiwe, noch Mellerscht nei die alt Kaserrn g’forrn is. Ower dodrüh wollt ich heut jo gornet reed. Mir geht’s heut ömm die neu Wollwicher Umgehungsströss. Endlich worsch jetzt vuur knapp zwee Woche soweit, unn die neu Ströss is eigeweiht wurrn. Jetzt senn die Wollwicher froh, dess außer sie sellwer keener mer durch ihr Durf föhrt und die annera fränn sich, weil se sich nixmer durchschlengel müssa. Die Meiste vo uns wärrn domit Wollwich ihr Laawe lang nixmer vo inne sehn. Durch muss mer also nixmer, ower allee scho s Vorbeiforrn is a Traum. Für die, wo sich dos Erlebnis noch net gegönnt hömm, well ich’s erklär. Vo Neuscht aus is alles noch normal. „Wollbach 5 km“ steht of’s Schild bei’n Kunert. Ower no geht’s los. Wenn merr s erscht Schild „Wollbach Süd“ lasst, oohnt merr als Frömmer scho, däss do jetzt a Riesen-Meddroboole komm muss. Gleich drauf, wenn’s „Wollbach Mitte“ un „Industriegebiet“ hässt, staunt mer, däss alles so schnell geht, wääs owwer sicher, däss doss, woss rechter Hand liegt, woss grösser’sch sei muss. Mer sieht a tatsächlich a Haus, wo sich Industrie dinn obg’spiel könnt. Wenn mer weiter föhrt und scho kurz drauf oo die Ausfahrt „Wollbach Nord“ vorbei künnt, is endgülldich kloor, däss mer in die letzta zwee Minute oo n reinste Moloch vo Stodt vorbei g'fohrn sei muß. Mer staunt ömmer noch, däss mer of eemol so a schnell’s Auto hot, is owwer ach irchendwie stolz d’rauf, däss mersch doch noch net abgewrackt hot. Drei Ausfohrte in zwee Minute für a Durf mit so viel Einwohner wie bei München Nord allee s erscht Hochhaus of die racht Seite hot! Verrückt! Oo alles hömm die geniale Schilderschreiwer vo Wollwich also gedocht, nur ee Chance hömm sa kläglich vergaawa. Wenn mer bei „Wollbach Mitte“ nooch rechts guckt, sieht mer n Kirchturm. Do hätt mer doch wallich zusätzlich zu "Industriegebiet“ noch "Messe" mit of’s Schild könn g’schreib! Wie dos wirked! Do dääda die Wollwicher no vollends of'n Koopf laff! Owwer ihr Umgehung seiere gegönnt! Servus, der Eustach. |
