| |
Allerweil müsse mir uns vuurkomm, wie sellamoll die heilich Maria unn ihr Josef in Nazareth. S Volk söll widder amoll gezehlt wär. Owwer mir hömms doo heutzudooch nadüürlich deutlich leichter. Von weechen, däss mir uns zum Zehla extra nei unner Geburtsstodt begaab müsse. Heutzudooch künnt a Interviewer neis Haus, ömm uns zu zehla unn auszufräächa. Owwer doss mit die Geburtsstodt wäär goornedd so schlecht. Merr könnt bei derra Geleechenheit gleich jede Menge Klassentreffen organisier, weil jo jeder Furrtgezoochener hemm nei sei Durrf komm müssed. Ower Pfeufadeggel. Allee bei uns in Bayern senn üüwer 16.000 vo darre Interviewer unterwaachs unn komma nei die Häuser. Mei Hedwich iss scho ganz aufgereecht, weil sa nedd wääs, wenn der Zählmensch künnt. Sie hodd extra die Fenster geputzt, die Stuuwe nausgewöscht unn fräächt mich jeden Dooch, wossa denn koch söll, wenn derjeenich Moo odder die Fraa zum Zähla künnt. Dabei söll die Fräächerei nerr bloß 15 Minudde pro Haushalt dauer. Mehr wie a poor Broodwürschd midd Kraut geht doo nedd! Annererseits iss die Streitfrooch bei uns inn Landkreis mit sei poor Leut sowieso, woos wohl länger dauert: die Birkwildzählung in die Rhöö odder eewa die Volkszählung. Noch könnt die Zeehlerei vo die Leut länger gedauer wie die vo die Birkhünner. Owwer worrds obb. Wenn doss mit den Bevölkerungsschwund so weiter gädd, werrn merr ball weenicher Leut wie Birkwild senn. So gaanz basst mirs jo aach nedd, däss ich nedd wääs, wenn die Zählerei sei söll. Mir senn alleweil vo früh bis oowerts daus s Ruuwehagge! Jetzt konn ich doch nedd eefoch mei Rüüwlich Rüüwlich läss gsei, bloß däss die orm Seel ihr Ruh hodd und ich mich hemm setz unn off dann Zählmensch worrd! Der Gotthold hodd gsocht, däss er jeden Dooch, wenn er zum Hagge gädd, n grössa Zeddel noo sei Haustür hängt, woo droff städd: „Bin zum Rübenhaggen hinten die lange Läng!“ Owwer woher söll denn der Interviewer wääs wo die lang Läng iss! Der sücht sich jo zu Tood! Ich hobbs gscheiter oogstellt. Ich hobb a Blöönla mit hie ghängt, wo mei Agger iss und vuursichtshallwer ach gleich noch a Haawe mitgenomme. Wenn die mich scho ausfrääch wella, no sölle sa aach gleich mitschaff. Schließlich well ich jo aach woss davo hobb! Servus, der Eustach. |
