| |
Die Daadsach, dässes allerweil kaum merr reend, iss schlimm, hodd owwer een Vuurdääl: ich ärcher mich üüwer a bestimmte Sach nixmerr. Es gädd ömm die Bittgäng, wie sa in die katholische Dürrfer in die kommende Woche widder gemocht werrn. Weil ich nedd erworrd konn, däss jeder wääs, woss a „Bittgang“ iss, well ichs kurz erklär: Bein Bittgang walle die Leut vo a katholisch Durrf midd Fahne, Mussig, natürlich n Pforr, unn - früher n Haufe, heutzudooch ömmer weenicher Leut – durch die Flur unn bitte n Herrgott ömm gudds Wadder für die Sood unn die Frücht off die Felder. Wenn ich jetzt Bolidigger oder Gelehrter wär, dääd ich s Gsetz vo die Bittgäng wie folgt formulier: „Die Menge an Regen, die in der Zeit des größten Vegetationsfortschrittes auf die vom Menschen in Wald und Flur ausgebrachten Pflanzen und Sämereien fällt, ist direkt proportional der Anzahl der Menschen, die sich an den von der katholischen Kirche in dieser Zeit organisierten Bittgängen beteiligt.“ Off gut Deutsch: „Je mehr Leut walle, desto mehr reents!“ Anscheinend walle merr also heuer eindeutig zu weenich! Und weils dasswache fast nixmerr reend, hobb ich een Ärcher weenicher. Während ich nämlich katholisch bin und somit wall, hodd der Gotthold als Evangelischer seiner Lehr nooch domit nix oon Hut. Und weil er nerr blooß 3 km entfernt in sei evangelisch Durrf wohnt, hobb ich mich bis jetzt jedes Johr drüü aufgereecht, däss mir Katholigga uns n Wolf gewallt hömm und bei die Bittgäng ömm Reewadder, Sonn und eewa gudd’s Wochswadder gebadd hömm, die Evangelischa in derra Beziehung owwer keen Schlooch gemocht unn trotzdem broffidierd hömm. Der Herrgott hodd uns Katholische nämlich bis jetzt erhört unn amoll läss reen und nochert widder die Sonn läss schein. Owwer weil der Petrus doss anscheinend nedd so genau gsteuer kannd, hömm die Evangelische 3 km weiter genau s sellwich Wadder wie mir ghood unn ihr Gedrääd und die Rüüwlich senn genauso schö gewochsa wie bei uns Katholischa. Driddbreddfohrerei nennt merr soowoss! Owwer weils jetzt nixmerr reend, gugge sie genauso nei die Röhre wie mir. Doo gidds nur ee Lösung: die Evangelische springe üüwer ihrn lange Schodda unn fange oo, mit uns zu walle. Wie wärsch denn: gleich murrn oowerts n hallwer siewe? Ich bin dabei! Servus, der Eustach. |
