|
So einen Durchenanner in’n Kolenner wie heuer hadd mer aach scho lang nixmer ghood. Merr bliggt ball nixmerr durch, weil aach noch s Wadder mitspielt und so künnts zu ganz komische Situatione. Weil ömmer s Wochenend nooch n erschte Vollmond im Frühjohr Össter iss, derjeenich Vollmond heuer owwer erscht n 18. April woor, senn alle beweechliche Feierdooch saumäßig spät. Vuurnachte woor der 1. Mai unn gleichzeitig iss Weißer Sonndich unn Konfirmation gfeiert wurrn! Wenn hodds denn sowoss scho amoll gaawe? Die Össter woorsch soo worm, dässda die Össter-Äär roh neis Nest geleech kannst und trotzdem hömmsa die Kinner hort gekocht raus könn genahm. Unn die Naduur iss so ball droo wie selten. S hodd scho Jorrn gaawe, doo hadde die Birke als Maibaame noch nedd ausgschlooche, heuer worrn sa beis Aufstella fast scho widder dürr unn die Bleeder wärrn ball widder roo falle! Unn die Droggaheit! Die Sood off die Felder gädd nedd auf, weils viel zu weenich reend. Und grood jetzt mit die villa Biogas-Anlooche bräuchte merr doch zum Beispiel jede Menge Mais! Wie hodd der Gotthold gemeent: „Wenn doss so weiter gädd, gidds n Härwest keen Strom und mir setza mit a Petroleumfunzel ins Wohnzimmer unn gugga Fernsehen!“ Baar wääs?! Die Könnshööfer Männerwahlfoohrt iss heuer erscht Oofang Juni. Do konns bassier, däss die Wallfohrer heuer s erscht moll unterwaachs Mähdröscher off die Ägger sänn! Pfingste röggt Mariä Himmelfahrt dermiinlich so gfährlich nooh, wie’s noch nie der Fall woor. Doss wenn so weiter geht, muss die Heilich Maria bei ihr Auffahrt nei’n Himmel aufbass, dässa nedd mit n Heiliche Geist zommrommbelt, weil der jo schließlich oo die Pfingsta vo oowa off die leidgebrüüft Christenheit nieder künnt. Stell dir amoll vuur, die Maria hört, wos ihr zukünftich dringend oozurooda wär, Verkehrsfunk unn „Radio Vatikan“ unterbricht die Ausstrahlung vo „Deinem Heiland, Deinem Lehrer“ für a wichtige Verkehrsmeldung: „Achtung, liebe Himmelsfahrer. Hier eine wichtige Verkehrsmeldung! Auf der Milchstraße kommt Ihnen zwischen der Troposphäre und der Stratosphäre ein weißer, taubenähnlicher Vogel entgegen. Bitte himmelfahren Sie äußerst rechts, fahren Sie nicht nebeneinander gen Himmel und überholen Sie nicht!“ Do gricht doch der Begriff „Geisterfahrer“ a ganz annere Bedeutung, odder?! Servus, der Eustach. |