| |
Däss alles ins Laawe relativ iss, döffet jo kee größ Geheimnis sei. Wenn zum Beispiel in Mellerscht oo een Dooch bloß drei Häuser obb- unn zwee Ströss aufgeressa werrn, isses relativ weenich, würrd in Müürscht mit sei villa Schulde oo een Dooch aach nur ee Stee beweecht, isses scho relativ vill. Apropos Müürscht. Die hodds ins vergange Joohr jo wallich düchdich erwöscht. Erscht fordert eener vo die Stadtteilsprecher, die Wassertemperatur ins Hallebood vo 29 off 26 Grad zu senka, ömm Geld zu sporrn. Der Bürchermesster lehnt ob, senkt die Wassertempertaur owwer nur a guude Woche später vo 29 of 0 Grad: Schwimbood zu!!! Und s künnt noch schlimmer. Kurz drauf iss die Stodt dezu gezwunge, vuur lauter Haushaltslöcher die Wassergebühre um mehr wie 30% zu erhöhn. Wos wissdn doo als Müürschter mach, wenn da dich wösch wisst? S Schwimmbood is zuu und s Dusche unn die Körperpfleeche mit die Zeit so teuer wie a Woche Urlaub in die Türkei. In so a dramatische Situation konnsta dich als Stodt nur gerett, indem du die Verwaltung rigoros abbaust und n Bürokratieabbau beschleunichst. Un just in die Zeit künnt die Meldung, dässes zukünftig widder mööchlich sei söll, off die alte Autokennzeichen vo vuur die Gebietsreform zurück zu wechseln. Also widder MET odder KÖN statt NES unn MÜN statt KG für die Müürschter. Ich wääs jo nedd! Mir wössa nix merr aus unn ei vuur lauter Vuurschrifte, Verordnunge, Gebühren unn Gsetze unn komme gleichzeitig off die Schnapsidee, die alte Autonummer widder eizuführrn. Verrückt! Unn wenn mersch amoll genau betrocht: woss brauche denn mir doo bei uns die alte Autonummer? Mir sänn doch aa soo scho, trotz einheitlich NES odder KG, wo die ennzelne Kissta her komme. Siehst du a Auto midd NES un s iss total verstaabt – ganz gloor. Doss konn bloß vo MET mit sei villa Baustella gekomm. Odder a NES-Auto mit a ganz degga Salzkruste of die Motorhauwe, s Dooch und n Kofferraumdeggel: eindeutig vo KÖN unn der Fohrer wohnhaft irchendwo ganz in die Näh vo doss Gradierwerk mit sei Salzausdünstunge. Und siehst du a Auto mit KG, nedd gewöscht, staabig, dreggert, du hosst n Verdacht, woos her gekomm könnt, bist dir owwer nedd ganz sicher. Halts oo, läss n Fohrer die Scheiwe roo kurwel unn riech nei. Muss ich noch weitere Worte beMÜN? Ich gläbb nedd. Servus, der Eustach. |
