| |
Ich muss zugebb, däss ich ganz gern mit mei Fraa nooch Schweiferrt zum Eikäffa fohr. Nedd dässes dürrt bessere Gschäffte gääb als bei uns. Naa, der Grund iss doss Kernkraftwerk in Grafenrheinfeld. Oo den Dampf üüwer die zwee grössa Kühltürm sidd merr nämlich schöö, woher der Wind weht. Gädd der Daampf vo die Autobooh gsenn noch links, iss Westwind, zieht er nooch rachts, hömmer Ostluft. N Samstich füür a Woche woor ich ganz erschrogge, weil üüwerhaupt kee Dampf zu senn wor. Unn wie ich oowerts bei doss Boliddiger-Derbläggn in Burglauer g’hört hobb, däss a ganzer Bus mit Leut vo Schweiferrt doo iss, hobb ich sofort erschrogge gedocht, däss mit doss Kraftwerk irchendwos nedd stimmt und der erscht Bus aus die Evakuierungszone scho doo iss. Typisch Schweiferrt, docht ich noch, kaum evakuiert unn scho in Burglauer beim Kreuzbergbier-Saufe! Owwer Spaß beiseite. So uungelegen dääde uns die Schweiferrter, Sennfelder, Schwebheimer usw. goornedd komm. Unner ganze junge Leut ziecha schließlich furrt unn Rhön unn Grabfeld bluude aus! Schuld senn merr sellwer. Mir saniern ee Gymnasium nooch es anner, vergrößern reihenweis die verschiedene Realschule, nenne die Hauptschul off eemol Mittelschul unn wunnern uns, worömm die junge Leut ömmer gscheiter werrn, studiern, unn nochert furrtziecha. Woos sölla sa denn aach annersch mach? Nahm amoll oo, a junger Moo well irchendwoss mit Raumfahrt mach, wohnt owwer in Gollmuthhause. Doo gädd nix midd Raumfahrt. Odder a jungs, guut ausgebildts, gscheits Määdle interessiert sich für Philosophie, hodd ihr Elternhaus owwer in Ginolfs. Keine Schoos! Zum Philosophiern brauchst du schließlich Menscha ömm dich römm. Also mir und n Gotthold nooch wenns gädd, sölla die Evakuierte ronnd ömms Kernkraftwerk im Fall des Falles ruhig komm. Dos konn uns nur racht gsei. Später, so in 30 – 40 Johr, wenn die sich in unner Dürrfer intergriert hömm, spiele sich no Szenen ob, wie 30 – 40 Johr nooch n Krieg. Do fräächa die Kinner no ihr Leut, mit wen bestimmte Männer odder Weiwer verwandt senn, unn die Eltern könne nur geantwort: „Mit goor keen, doss senn Flüchtling vo Röthlein!“ Odder s Kind fräächt, worömm der Vuurstand von Schützeverein n annere Dialekt hodd. Antwort: „Do brauchste dich nedd zu wunnern, Kind. Doss iss a Schweinfurt-Deutscher!“ Servus, der Eustach. |
