| |
Nachda, also braggdisch gestern, hodd mei Fraa s erscht moll seit fönnef Woche widder mit mir geredt, nerr bloß weil ich ihr n Valentinsdooch kee Blomma gschenkt hadd. Fönnef Woche lang hodd sa off stur gschalt unn s Reeda mit mir eigstellt. Woor im Nochhinein goorned so schlacht, muss ich sooch. Eine Ruh! Ich halt vo die Blommakäfferei n Valentinsdooch eefoch nix! Ich renn doch aach nedd n Bus nooch, wenn ich schon dinn setz, odder? Die Frooch iss sowieso, wie lang sich der Valentinsdooch in die Zeite vo Gleichberechtigung, Gleichstellungsbeauftroochde, Selbstverwirklichung vo Moo unn Fraa usw. noch als solcher g‘halt konn. Wenn doss nämlich alles so weiter geht, müsse mir Menner sääh, wie merr zu unner Recht komma. Alleweil wärrn rauf unn noo Frauenquoten diskutiert. Die CSU hodd 40% beschlossa, hodd owwer bloß 18% weibliche Mitglieder. Blöd, nä? Noch schlimmer bei unnern Männergsangverein. Der Frauenbund well, däss zukünftig 25% Weisbiller nei die Vuurstandschofft gewählt werrn. Jetzt senn mir owwer bloß Männer! Wie hodd der Gotthold gemeent: „Sauf amoll 5 Bier auss’n Kossta Bier, wenn er leer iss!“ In Waldberg iss 2010 mit Ausnahm vo die Männerwallfahrt vo Könnshoofa aach die letzt Bastion in unnern Landkreis gfalle, wo die Männer bis jetzt noch unter sich geblei kannde: a Fraa iss Feuerwehrkommandant(in) wurrn! Owwer zurück zum Valentinsdooch. Weil der Vodderdooch im Vergleich zum Mudderdooch jo ömmer noch a bedauerlichs Schattendasein führt (Unterschied: n Mudderdooch geht’s zum Essa, n Vodderdooch zum Saufe), fordern der Gotthold unn ich hiermit offiziell die Einführung, sooche merr amoll, von „Hedwichsdooch“, zum Beispiel n 17. September, wo die Weiwer ihr Männer odder Liebhaber traditionell a grössa, gerächerte Blutwurscht schenke. Woss hädde die Metzger für a Frääd unn domit aach ihrn Feier- unn Zoohldooch. Woss n Gärtner recht iss, muss n Metzger schließlich billig sei. Obwohl merr doss Wurrt „billig“ in Zommahang middn Metzger jo ächentlich nedd verwend söllet. „Ja, ja“, hodd der Gotthold gemeent. „Wär wääs, wo doss noch alles hieführt. Heut senn die Weisbiller Bundeskanzler, Minister sowieso, Skispringer, Bischof, Boxer, Schmied, Bobfohrer unn wääs der Deifel, woos noch alles. Worömm sölle se nedd irchendwenn aach rückwärts eigepark könn???!!!“ Servus, der Eustach. |
