| |
N kommende Freidich isses widder soweit unn der Michl Müller vo Garitz in die Rhöö (!) zieht bei „Fastnacht in Franken“ in Veitshöchheim sei grösse Schau obb. Der Michl hodd jetzt n vergangene Freidich in Kitzinge aach n diesjährige „Schlappmaulorden“ verliehe gricht. Ächentlich müsst ich in unnern Dialeggd jo äährer vonn Schlabbmaulorden schreib, owwer der konn in derra Schreibweis wohl nur n Honnd verliehe wär. Weil der Michl owwer a echter Hund iss (unn dezu bekanntlich aach noch a „Dreggsagg“), konn ich guten Gewissens weiter vonn Schlabbmaulorden gschreib. Raffiniert senn die Leut vo dann Kitzinger Faschingsverein, der den Schlabbmaulorden jedes Joohr verleiht, jo scho. Du wissd n Michl Müller für dei Brunksitzung, grichsdn owwer nedd, weil er erschtens nedd billich iss, unn zweddens terminlich kommbledd ausgebucht iss. Owwer nix eefocher wie doss: Schlabbmaulorden verliehe, unn der Michl künnt zunn Nulltarif! Däss er nochert aach n Vuurdroch hält, iss doch wohl gloor. Bei vuurheriche Breisdräächer woor doss nedd ganz so eefoch. A Helmut Kohl zum Beispiel iss komma, hodd sein Orden gricht, a Reed vo a hallwe Stonn g’hallde, noch der s Bubbligum erscht widder aufgeweggd wäär mussd, no hodd er schnell noch n ganze Säumooche wagggfressa unn iss mit sein Hubschrauber von dannen gflooche. Nedd viel annersch woorsch wohl bei’n Erwin Huber, bei’n Günther Beckstein unn bei’n Guido Westerwelle. Wie’s die Breisdräächer gschafft hömm, ins jeweilich Joohr - wie vuurgschriewe - durch Wortwitz aufzufalle, iss mir heut noch a Rätsel. A vergleichboore Idee vo mir: Der SV Schmoolwasser will unbedingt amoll geecha Bayern München spiel. Kee Brobleem: eefoch n Wanderpokal gschaffe, gleich als erschtes oo Bayern München verliehe unn scho müsste sich Ribery, Robben unn Co. inns Schmoolwasserer Rhönstadion die Füss brech. N besta Vuurschlooch für a ähnliche Daggdigg hodd nadüürlich widder der Gotthold geliefert. „Wenn ich Vuurstand vo n Junggsellaverein wär, dääd ich n „Dobbelwobberorden“ schaff, ihn nochananner der Angela Merkel, der Alice Schwarzer unn der Claudia Roth verleih unn no als gröönenden Höhepunkt ins viert Johr der Dolly Buster zusprech. Die döffed no bei die Breisverleihung nadüürlich aach a Kostbroob vo ihr „Können“ gabb unn die Generalversammlung wäär geredd’!“. Servus, der Eustach. |
