|
Wenn merr sidd, woss grood in Länder wie Dunesien und Ägübbden los iss, muss merr feststell, dässes off die Welt alleweil widder amoll so richtig rund gädd. S Volk begierd auf, unn die Herrscher hömm grössda Müh, die Leut im Zaum zu hallde. Woss no ömmer ganz schnell verhängt würrd, iss a sogenannte Ausgangssperre. Ab vier odder fönnef Uhr nochmiddooch döff sich no kee Mensch merr off die Ströss läss bligg. Unn wer wääs, in Zeite vo Stuttgart 21, Castor-Transporte, Laufzeitverlängerung, zu langsams Indernedd usw. gidds jo aach bei uns middlerweil jede Menge Wutbürcher, die irchendwenn off die Ströss gänn unn demostriern. Off a ewenduell drohende Ausgangssperre müssa aach mir uns so langsam owwer sicher vorbereit, unn ich well euch amoll a boor erschta Dibbs gab. Wenn du als Moo zum Beispiel gern nei die Wirtschoft gässd, musst da unbedingt zusääh, dässda scho vuur die Ausgangssperre dinn bist. No döffsda bis früh nixmer raus. Woss bessersch konn derr doch goorned bassier, odder? Oder wenn dich a Ausgangssperr n Sommer dreffd unn nooch Feieroomd dause in’n Gorrda n Haufa Ärwed worrd, die da nedd gerrn mechst: Kee Problem, zööchersch naus bis fönnef Uhr, no iss Ausgangssperre unn du döffst nixmerr naus! Doo konn die Fraa nochert noch so gegnöör, s gädd eefoch nedd! A Ausgangssperre iss schließlich sowoss ähnlichs wie Hausarrest. Beim Noochdenga iss mir gloor wurrn, wie sich die Bedeutung vo Hausarrest heutzudooch geändert hodd. Süsst senn mir als Kinner nooch die Hausaufgaab jo dehemm furrt unn bisses Gebaad geläut hodd, nixmer hemm komma. Hausarrest wor do a richtig horrda Stroff! Heut wella die Kinner vuur lauter Fernsehgugges unn Kombjuderspielerei owwer goornix merr aus’n Dembl naus! Derra wenn du heut Hausarrest gissd, fränn die sich noch, weil sa dehemm blei döffa unn weiter Nindenndo usw. gschbiel könna. Die Kinner konnst du heut nur gstroff, wenn sa zum Bespiel a ganze Woche lang jeden Nochmiddoch furrt müsse unn bis oowerts nixmer hemm komm döffa! Der Gotthold hodd zum Thema Ausgangssperre drogga gemeent, däss ihn sowoss in Sachen Wirtschoffd nedd besondersch horrd treff dääd: „Die Ausgangssperre hobb ich scho seit a boor Johr, verhängt vo a gewissa Alma, 1,63 m groß, knabb zwee Zenner, unn seit 37 Johr midd mir verheiert!“ Servus, der Eustach. |