| |
München bewürrbt sich alleweil jo ömm die Ausdroochung vo die Olümbische Winterspiele 2018. Und weils in München kee grössere Hüggel gidd, söll in Garmisch Schii g’forrn weer. A Dääl vo die Bauer dürrt iss domit owwer goornet eiverstanna unn wehrt sich mit Händ unn Füß. „Ich bin amoll gspannt, wie lang doss IOC dann Zirgus noch mitmecht!“, hodd der Gotthold gemeent. Ja, ja, doss muss merr sich scho frääch. Rugg-Zugg, unn die gschätzt 30 Millione Euro Bewerwungskoste senn bein Deifel! Woss vill Leut nedd wössa, is jo, dässes bei uns ins Landrootsamt scho n Geheimbloon gidd, 2018 für München eizuspringa. Alles is scho fertig unn es gidd a degga Mabbe, wo alles fein säuberlich dinnstädd. Olümbische Winterspiele 2018 in Rhön und Grabfeld – dos wärsch doch, odder? Biathlon müsst unbedingt in eena vo die Schützen-Hochburgen Bahra, Serrfeld odder Gollmuthhause sei. Skispringen wär kee Frooch, natürlich Haselbach. Ski albin wär aa ziemlich kloor: Abfahrt üüwers Kanonerohr, Slalom bei’n Roth unn Riesenslalom oon Arnsberg. Die Langläufer könnt merr, wenn nedd grood widder Hochwasser iss, durch die Saalewiesen zwöscha Neuscht unn Salz g’hetz, Eisschnellauf unn Eiskunstlauf müsst off die Eisbahn sei, obwohls doo platzmäßig no scho a weng eng würrd. Nedd eefoch würrd Rodeln unn Bob. Owwer aach doss wär zu löösa. Däss sich Könnshoofa nedd beschwert, könnt merr in die Rhön-Därme die Riesenrutsche vereis und dürrt gerodel. Zweier- unn Viererbob in Neuscht, Riesenrutsche voss Triamare vereist. Laang wäärsch jo nedd grood, owwer speggdaguläär! Eisstockschießen könnt merr in Mellerscht gemach. So a Eisstock sieht ömmerhie aus wie a klenna Abrissbirn, unn wenn amoll so a Gschoss üüwer die Booh naus schisst – Mellerscht iss s Abreißa jo derzeit gewöhnt. Een Albtraum hodd unner Landrood, der natürlich die Eröffnungsformel sprech dääd, scho jetzt. Er städd zur Eröffnung offn Neuschter Morrdblatz, hinner sich doss riesig olümbisch Feuer, vuur sich Tausende vo Leut, Milliarde weltweit oo die Fernseh. Er setzt grood zu sei Reed oo, als sich plötzlich hinner’sch Feuer ein mächtigs Windrood aufbaut, sich zu drehn oofängt unn die frisch oogebrönnt Flamme ausblösst. Blamaasch, Blamaasch! Nei inns Elektroauto unn nix wie furrt! Servus, der Eustach. |
