| |
Erscht amoll noochträchlich „Brossd Neujohr“ oo alle! Ich hoff, däss ihr s neu Joohr guud oogfange hobbt. Guud oogfange hodds vergange Johr jo aach für die deutsche Hoteliers, weil just jetzt vuur a Joohr der Steuersatz für Üwernochtunge in a Hotel vo 19 off 7 % gsenkt wurrn iss. Villa Hotelbesitzer hädde jetzt investiert, seecht die Rechierung, unn es hätt sich gelohnt. Ich wäss jo nedd; do müsst merr doch wos merk, odder? Sei’s wie’s well, mein Seechen hömmsa unn sölla ihrn Groocha vool griech. Owwer wie ich jetzt zwöscha die Jorrn gelasst hobb, wie sich doss mit dann reduzierte Mehrwertsteuersatz verhält, senn merr doch die Aacha aufgange. Grund für den reduzierte Satz iss alles doss, woss s Gemeinwohl nützt. Unn jetzt gädds los: für genießboore, getroggelde Säuohrn gilt der ermäßicht Satz, ungenießboore, getroggelde Säuohrn wärrn normal besteuert. Der ermäßigt Satz vo 7% gilt aach für ganze Haussäu, für Wildsäu müssa 19% obbgedröggd wär. Tomatemark unn Tomatesaft senn ermäßigt, Kätschabb unn Tomatesoß nedd! Obwohl doch grood Kätschabb zweifellos unnerm Gemeinwohl dient! Frääch amoll die Kinner unn die Millione McDonalds-Gäst! Abrobos McDonalds: wenn da a Currywurscht dürrt esst, senn 19% MwSt. droff, wenn da sa eigebaggd mitnimmst unn ins Auto esst, 7%. Oder Islandmoos: würrd a Adventsgraanz aus frisch Islandmoos gflochte, senn 19% MwSt. droff, würrd er aus drogges Islandmoos gemocht, iss die MwSt. bloß 7%. S Interessandst do droo iss, däss üüwerhaupt Leut gidd, die sich n Adventsgraanz aus Islandmoos käffa. Unn jetzt der Hammer: 7% MwSt. gilt für alle Oorde vo Gäul, dood odder lewendich, unn aach für reinrassige Esel, do owwer nur, wenn sa scho gschlocht senn. Der Esel iss also wie ömmer der Esel - aach wenns ömm die Steuer gädd. Dissgriminierung hoch vier iss doss! Iss nämlich a Stögg Gaul dabei (Kreuzung zwöscha Esel-Moo unn Gäuls-Fraa = Maultier odder Kreuzung zwöscha Esel-Fraa unn Gäuls-Moo = Maulesel), iss der MwSt.-Satz of 7% reduziert. 19% senn also nur für lewwendiche, reinrassige Esel ohne jedes Stögg Gaul fällig. Wenn ich a Esel wär, stööned ich rugg-zugg mit unner Rechierung vuur’s Bundesverfassungsgericht! Servus, der Eustach. |
