| |
Onnder s Moddo „A jeder künnt nei’s Internet, a jeder, bloß die Inder nedd!“ hömm aach der Gotthold unn ich die Mööchlichkeit, uns ins „WörrldWeidWebb“ zu informiern. Und weil ich in die vergangene zwee Woche in die Noochrichta laufend doss Wurrd „Kaddaar“ ghöört hobb, unn nix mit oogfang konnd, hobb ich bei Guugl s Sücha oogfange. N besta iss jo ömmer, merr sücht noch doss, woss merr als Erschtes denkt, wenn merr a frömms Wurrd hört. Ich hobb bei „Kaddaar“ gleich oo n Schnupfa gedocht. Vier Stonn hodds gedauert, biss ich in dann Kombjuder rausgfonna hobb, däss merr Katarrh „Katarrh“ schreibt. Doss is jo fast so schlimm wie Rhythmus! A Katarrh iss laut Indernedd-Lexiggon „eine Entzündung der Schleimhäute, die mit einer vermehrten Absonderung wässrigen oder schleimigen Sekretes verbunden ist“. Off gut deutsch: die Noosa tröpft! „Du würrscht doch nedd glääwa, däss der Radio doochelang üüwer nix annersch wie a Rootzglogga bericht!“, hodd der Gotthold gemeent. Racht hadd er natürlich. S iss ömm die Fußball-WM gange, die für 2022 noch Katar vergaawe wurrn iss. Noch Katar! Hallwer so groß wie Hessen! Do konnsda jo vo Spiel zu Spiel midds Foohrrod gfoohr. Du musst blooß aufpass, dässda dir doo dabei bei 50 °C die Bladda nedd verbrönnst! Do nütze dir die glimadisierde Stadien aach nix, wenn medda of dein Koopf a Brandbloosa so groß wie a Spiecheläähr drohnt. Wobei doss mit die tiefgekühlde Stadien goornet so schlacht iss. 2024 könnt jo no aach gleich die Eiskunstlauf-WM dürrt in die Wüste gemocht wäär! Würrd die Klimaoolooch halt noch drei Strichlich weiter roo gedräht. Unn noch wos: Fußball iss in Katar nerr bloß die Sportart Nr. 3. Nummer 1: Kamelreiten! Nummer 2: die Falknerei! Onn solche Vööchel griecha die Fußball-WM! Ower irchendwie hodds doch woss gudds. Ich hobb bei mei Reschärsche ins Indernedd nämlich aach erforrn, däss a „Kater“, also der schlimm Zustand früh nooch n mords dromm Rausch, gornix midd a Katz zu tun hodd, wie ich ömmer gegläbbt hoo, sondern „eine Verballhornung des Wortes Katarrh“ iss. Widder woss gelernt! Irchendwie muss merr der FIFA also doch dankbor dafür sei, däss zum Beispiel England unn die Ami jetzt orch verschnupft senn, weil die WM noch Katarrh, Entschuldichung, noch Katar vergaawe wurrn iss. Servus, der Eustach. |
