| |
Erscht jetzt hodd merr der Gotthold so ganz beiläufig verzehlt, däss der Jean Pütz (fränkisch: Schoo Bütz) im gseechnete Alter vo 74 Johr noch amoll Vodder vo a Tochter wurrn iss. Wer n Schoo Bütz nedd kennt: er hodd a Maul wie a Maschinegewehr, a grössa Schnurra unn woor villa Johr lang Fernsehmoderator. Sei bekanntst Sendung woor die „Hobbythek“, a Schou für Bastler unn Düffdler. Unn jetzt hodd eewa dieser Schoo Bütz noch amoll Nochwuchs gricht. Domit wääs merr aach, woss für interessante Hobbys er selwer hadd. Vodder mit 74 – off die ee Seite a schönna Sach, off die anner Seite nadürlich aach irchendwie bedenklich. In Deutschland werrn die Frauen zur Zeit durchschnittlich 82 Johr unn 6 Mooned alt, die Männer nerr bloß 77 Johr unn 4 Mooned. Für dann Unterschied vo ömmerhie 5 Johr unn 2 Mooned iss für die Frauen defüür aus biologische Gründ owwer ach scho uugfaahr 30 Johr eehrer Schluss mits Kinnergriecha. Woss der Schoo Bütz sei Töchterle durch sei hochs Alter zuumut, iss, däss er - rein statistisch nadürlich - bloß noch 3 Johr unn 2 Mooned zu laawe hodd. Doo wär doss Kind no genau so alt und hädd scho keen Vodder merr. Dezu künnt, däss daar Schnurrabädder scho die drett Fraa, n Sohn mit 51 unn a annere Tochter mit 11 Johr hodd. Bei so a Biografie könne mir „normale“ Männer nadüürlich nedd mit ghalt. Jetzt stell der amol vuur, der Schoo Bütz brengt sei jüngsts Töchterle in 3 Johr nei’n Kinnergorrda odder in 6 Johr (mit 80!) nei die Schul. Der würrd doch zu 100% unn ohne jeden Zweifel vo alle Beteilichde als der Opa oogsenn. Unn wenn der Bruder vo doss Meedla in 19 Johr sein 70. feiert, iss die Klee grod amoll volljährig wurrn. Gspannt bin ich jo, obb unter derra Ömmständ der Johannes Heesters (n kommende Sonndich würrd der 107!) aach noch amol oosetzt. Zuzutraue wäärsch enn jo. Do müsst merr sich ömms Kind owwer aach kee Surche mach, weil der Jopie jo mit Sicherheit 150 Johr alt würrd unn sich doss Kind noch 43 Johr lang üüwer sein Vodder gfrää könnt. Abroboo Heesters. Eehner vo die schönste Witz üüwer dann unn sei Fraa, die Simone Rethel, gädd so: Klingelts dehemm bei die Heesters’ oo die Haustür. Der alt Heesters schleppt sich zu die Tür, mecht auf unn sidd, däss der Tod mit sei Sense offn Buggel daus stätt. Dräht er sich römm, unn rufft nei’s Wohnzimmer: „Simone, für dich!“ Servus, der Eustach. |
