| |
Mit a weng Abstand well ich jetzt die Brodessde bei’n letzte Castor-Transport aach noch amoll aus die ganz speziell Sicht von Gotthold unn mir beleucht. Merr konn jo zu die Kernkraft gstääh wie merr well. Tatsach iss owwer nuu amoll, däss mir uns irchendwenn demograadisch defüür entschieda hömm unn dasswaache aach sääh müsse, wie merr n Dreeg vo die Dinger widder los wärrn. Weil der Gotthold unn ich vill Zeuch nedd so eefoch begreufa, bleibt uns oft nix annersch üüwrig, als Vergleiche oozustella. „Gotthold“, hobb ich g’socht, „nahm amoll ooh, die Vorstandschaft vo n Sportverein hodd demograadisch a Zwiebelkucha-Essa mit Federweißer beschlossa, unn die Mitglieder setza no schöö zum Essa unn Trinka zomm. Wenn nochert die erschta Leut‘ off’n Abort müsse, weil ihr gezwiebelte „Brennstäb“ verdaut senn, unn verstärkt durch die Wirkung voss „Kühlwasser“ n Dorrm belaste, no könna sich doch die annera, die keen Zwiebelkucha mööche, aach nedd so eefoch offn Gaang gsetz unn n Waach nei’s Klo versperr, odder? Schließlich iss jo der Platz voss menschlich’ „Zwischenlager“ nooch die „Wiederaufbereitung“ begrenzt und es braucht früher oder später a sichersch „Endlager““. „No ja, doss iss scho a weng weit herg’hollt, owwer ganz Uuracht hossda nedd!“ hodd der Gotthold gemeent. Womit mir zwee uns aach schwer dunn, iss der Begriff „gewaltfreier Widerstand“. Gloor isses gewaltfrei, wenn ich mich irchendwo off a Boohschiena odder a Ströss setz unn keen merr durchläss, owwer Widerstand bleibts in jedem Fall. Setz du dich amoll mit zeeh Leut völlig gewaltfrei in Neuscht off die Geis-Kreuzung, ömm geecha die gebloond neu Ambel dürrt zu broddesdirrn. So schnell guggsda nedd, iss die Bolizei do unn schläfft dich furrt. Unn von weechen, ohne die Personalien aufzunemma! Däss mir bei uns in die Geechend zwoor aach gut demonstrier könna, owwer in derra Beziehung doch annersch senn, hodd merr s Frühjoohr gsenn, wie merr mit 50 Busse off München g’forrn senn, ömm geecha die Siemens zu demonstriern. Off‘n Waach von Busparkplatz zu die Siemens-Zentrale senn merr in Grübblich bei jeder Fußgänger-Ampel, die Rot woor, schöö stenn gebliewa, unn hömm broov geworrd, bis Grün komma iss. Owwer so senn mir halld. G’fall lässa merr uns zwor nix, owwer so richtig wohl fühle merr uns bei’s Demonstrirrn halt aa nedd richtig. Servus, der Eustach. |
