| |
Dässes bei uns in die Geechend nixmer viel - zumindest vierbeeniche - Rindviecher gidd, döfft jo allgemein bekannt sei. Die Kinner denka mit die Zeit scho, däss die Mellich of Baame odder gor scho gleich im Deddrabagg wöchst unn ömm a leibhaftiche Kuh zu senn, musste in a boor Joohr wohrscheinlich nei’n Zoo fohr. Dabei senn Küh richtig interessante Tiere. A Kuh fühlt sich, wie ich neulich gelasst hobb, zum Beispiel bei + 5 °C enn wohlste. 5 °C! Doss iss für uns Menscha jo scho a Säukält! Bei 30 °C gänn die Küh ball kabudd vuur Hitz unn wenn merr of eena vo die weeniche Wääd guggt, stänn die Küh bei Sommerhitz ömmer gschlossa in n Schodda vo die Baame. Däss der Mensch do ganz annersch gepolt iss, sissda, wenn da n Sommer nei die Freibäder guggst. Do liecha sa so massenhaft in die prall Sonn, dässda nedd wässt, wär jetzt s intelligentere vo die zwee Lebewesen iss: der Mensch odder die Kuh? Unn wie bös behanneln monche Bauern doch ihr Küh! Nedd weenich schneide zum Beispiel aus verschiedene Gründ die Hürrner roo unn wie jetzt zu laase woor, streite sich die Gelehrte drüüh, ob nochert nedd aach die Mellich schlechter schmeggt. Racht hädda die Küh jo! Aach der Gotthold hält vo’s Kürza vo die Kühhürrner rein goornix. „Wo wissta denn no zum Bespiel beim Füttern dein Hut hie häng?!“ hodd er g’fräächt. Jetzt hodd merr der Küh durch die künstlich Besamung scho die Frääd mit n Bulla genomma, no bloochd merr sa aach noch so. Kee Wunner, wenn so monche Kuh hundswiderwärtich würrd, unn sich in‘n Stohl aufführt wie die Sau. Ja, ja, mit die Rindviecher hodd merr scho sei Blooch! „Gotthold“, hobb ich g’socht, „Du hossd doch aach soo’n Ärger midd dein Bulla g’hood, weil er nixmer so richtig gekönnt hodd, unn Brobleeme mit sei Boddenz hadd. Funktioniert‘n doss widder?“ „Ja, ja!“, hodd er strahlend verzeehlt. „Priima gädds widder middn. Der Tieroorzt woor doo unn hodd merr so klenna, gellwe Dableddlich fürrn gaawa unn seitdem konn der widder wie a Junger!“ „Du, doss frääd mich. Die besurch ich merr für mein Bulle aach. Sooch merr amoll wie die Dableddlich hässa, doss well ich miir amoll aufschreib!“ Und woss seecht mei Gotthold, der Spezialist? „Wie sa hässa, wääs ich nedd, owwer sie schmegga nooch Pföfferminz!“ Servus, der Eustach. |
