| |
„Wos hossdn dei Fraa doomols zu die Silwerhochzich g’schenkt?“, hobb ich n Gotthold gfräächd. „A Reise nooch Australien!“, meent er ganz stolz. „Woos? Nooch Australien? Doo hossda die Latte owwer ganz schöö hoch geleecht!“, hobb ich gsocht. „Wos wissdn doo erscht zu die Golden Hochzich schenk?“ „Wääs ich scho! Doo läss ich sa widder hool!“ Ja, ja, die Heierei! Wer jetzt vuur knapp zwee Woche, n 10.10.10, die Kurve nedd gricht hodd, für den gidds nur noch zwee Mööchlichkeite, oo so a brominents Datum zu heiern: n 11.11.11 odder zum ultimativ letzta mool n 12.12.12. Doss iss dann zwoor scho medda in’n Herwest bzw. Winter, owwer danooch isses 91 Johr lang, bis zunn 01.01.2101, aus mit die Herrlichkeit. Wobeis in jedem Johrhunnert sowieso nur 12 Joohr mit so leicht zu merkende Hochzicherdeech gidd, nämlich jeweils von 01.01.01 bis zum 12.12.12. Und den absoluten Hammer-Hochzicherdooch mit alle maximal 8 gleiche Zohla ins Datum hodds sowieso nur eemol gaawe und gidds aach niemols mehr widder. Unn den hömm mir alle wie mer doo senn kloor verpasst. S wor der 11.11.1111. Wos gläbbsda denn, wos do vur 899 Johr off die Standesämter in die ganz Welt los woor! Interessant wärrn ach der 10.10.1010 unn der 12.12.1212 gewasst, owwer aach für die Dooch hodd der alt Abraham noch nedd amol drüü nooch gedocht, unns in sein berühmte Wurschtkessel üüwerhaupt nei zu schmeißa. Alles Schmarrn meen ich! S Johr iss völlich wurscht, entscheidend iss der Dooch, oo dann da heierst. „Ich als spoorsammer Mensch hobb n 29. Februar g’heiert.“ hobb ich n Gotthold informiert. „29. Februar?“ stutzt er. „Dos gidd’s doch nur in a Schaltjoohr?!.“ „Eewa drömm!“, hobb ich gsocht. „Off die Oord unn Weis hobb ich kee Silberhochzich müss feier und so n Haufe Geld g’schboord. Rechersch aus: Hochzicherdooch hadd ich ner blooß nooch 4, 8, 12, 16, 20 unn 24 Johr. Wie mich mei Heddwich doo scho of die Silberhochzich oog’sprocha hodd, hobb ich g’socht, däss sa a Joohr zu ball droo iss. Entweder gscheit odder goor nedd! Unn vier Johr später, nooch 28 Johr, hobb ich g’socht: „Ja jetzt künnsda oo gschlabbt, jetzt iss mersch zu spät!“ A Hund bin ich scho, odder? Servus, der Eustach. |
