| |
N Gotthold und miich fasziniert ömmer widder, wie sich die Zeite geändert hömm. S gidd etliche Situatione woo merr doss ömmer widder deutlich merkt. A schöns Beispiel iss der Düff. Ihr wösst scho, doss iss doo, wo merr alle zwee Johr midds Auto odder n Bulldogg hie muss, ömm sich a neue Blagedda zum Weiterfohrrn obzuhoola. Woss wor doss noch vor 30 Johr für a Zirguss, hä? Scho n Oowend vuur dein Dermiin bissta off Salz g’forrn, hossd dei alte, verrossda Kissda nei die Reih g’stellt und dich no vo dei Fraa odder n guuda Freund widder hemm läss fohr. Die Nocht üüwer hossda kee Aach zugemocht, weil da laufend drüü simuliert hossd, ob da wohl widder durchkünnst odder obs schnuurstraggs vo’n Düff nei die Werkstodd odder goor off’n Schroddblatz gädd. In aller Herrgoddsfrüh bissta no widder noo g’forrn und wie da in die Reih g’stanna worrscht, hossd’n s erschtmoll seid zwee Joohr widder g’sänn unn vuur allem g’höört: N Urban!!! Berühmt-berüchdicht, gnadenlos, streng, demberamenndvoll und doch midd’n wächa Kern. Kombromisslos hodd er sein Dschobb gemocht und ronnd ömm n Düff hodd a Admosphäre g’herrscht wie a boor Kilometer weiter in Mellerscht off’n Kaserrnahof. A Foohrt nei die DDR unn die Kontroll oo die Grenz wor a Dreeg dageecha! Und heut? Wenn da n Samstichfrüh schö ausgschloffa zunn Düff föhrscht, brauchste scho goor keen Termin mehr. Du parkst, steichst aus, gässt nei’s Karbüffla und meldst dich oo. Die Fraa hinner die Theke iss überaus freundlich und wenn da frächst, ob da zu die Untersuchung vuur fohr sösst, künnd scho der Prüfer, lacht, grüßt dich, fräächt dich noch dein Autoschlüssel und seecht, däss da doo geworrd konnst. Die Fraa hinner die Theke biet dir n Kaffee oo (!) und bitt dich, doch Platz zu nahma. Do denkst kurz oo n Urwan, hältst alles nedd für möglich, lässt owwer alles hocherfreut g’schääh. Nooch a viertel Stonn künnt der Prüfer widder, beglückwünscht dich zur bestannena Prüfung, gidd dir dein Schlüssel widder und wünscht n schönna Dooch. Wie in’s Schlaraffenland, odder? „Owwer een Unterschied zu süsst gidd’s doch!“, seecht der Gotthold. „Während ich 1975 für mei Auto bei’n Düff noch 22 Mark (also 11 Euro) bezoohlt hobb, drögg ich heut 85,50 Euro obb!!“ Unn für knapp 75 Euro könnt merr sich alle zwee Johr scho amoll vo een wie n Urban roo läss laff, odder? Servus, der Eustach. |
