| |
Wenn bei uns dehemm so wie jetzt widder s neu Brogramm vo die Volkshochschul nei’s Haus fladderd, hobb ich normalerweis gor kee Schoos amoll n genauere Bligg nei doss Heffdla zu werfa. Ruggzugg hodd sichs mei Hedwich gegrallt unn kee zwee Stonn später issa schon für’n erschta neue Kurs oogemelld. „Kurs K 502“ hobb ich off die Oomeldungskorrda gelasst, die in die Köcha römmgelaache woor. Weil’s mich doch indrissierd hodd, hobb ich in’s Heft noochgeguggt unnn wie ich gelasst hobb „K 502 – Bauchtanz für Schwangere“ hobb ich gedocht, mich trefft der Schlooch. S hodd sich no owwer rausg’stellt, däss sich die Hedwich nur bei die Nummer verschriewa hadd unn sich für Kurs G 216, „Selbstverteidigung für Seniorinnen“, oomeldt wollt. Gott sei Dank, docht ich erleichtert, liewer söll sa mich broffesionell offs Kreuz leech äss bie in ihr doch scho hoch’s Alter noch amoll a Kind griech. Ich woor no doch neugierich, hobb doss Heffdla mit nei die Wirtschoft genomma unn mit n Gotthold zomm dinn römmgebleederd. Und wie hömm mir zwee g’staunt, woss heutzudooch alles gidd. „Beifuß und Ingwer gegen kalte Füße“ unn „Foxwalk (also Fuchsgang) – Stressabbau in der Natur“ wor jo noch einigermaßen zu kapier‘n. Unn däss die Feldenkrais-Methode nix mit n ronnda Agger zu dunn hodd, wor a schnell gloor. Owwer so ab Seite 37 iss no so richtig los gange. Bis merr „Sirimanee Chatrojjanasakul“ als Nooma vo a Thailändisch-Lehrerin unfallfrei vurgelaas konnte, senn scho 10 Minudda vergange. Bei „Tai Chi Chuan“, „Qi Gong + Südshaolin“, „YiJinJing 14“ unn „Zumba-Latino-Aerobic“ hömm merr no schnell kabidulierd. Nou Tschääns! „Gotthold“, hobb ich g’socht, „stell dir amoll vuur, du wäärest gezwunga, dich für een vo darra Kurse oozumelde. Woos däädsda nahm?“ „Klangschalenmeditation, Lach-Yoga odder Pilates. Do wösst ich zwor genauso nedd, woos mich erworrd dääd, owwer ich könnt wenichstens die Ooomeldung ausg’föll!“ Dos hodd mir irchendwie eigeleucht. Ich schwank jetzt noch zwöscha „Feng Shui zur Problemlösung“, „Meridian-Mantren-Singen“ odder „Männer am Herd 1 - Auch ohne Püppchen ein warmes Süppchen“. Unn verzweifelt süch ich in’s Volkshochschulprogramm „Herbst 2010“ nooch wie vuur vergeblich nooch mein Traumkurs „Durchbliggerlehrgang für Fortgeschrittene“ in Waldfenster. Servus, der Eustach. |
