| |
Merr konn jo wallich nedd behaupt, däss bei uns in die Geechend der Bär steppt odder mir goor der Noowel der Welt wärrn. Ganz im Geechadääl. Wenn die Siemens nedd oofangs vos Joohr oogekündigt hädd, in Neuscht n Haufe Ärrwetsplätz obzubaue, dääde sogoor in Bayern vill goornet wöss, däss unns üüwerhaupt gidd. Wenn merr annererseits sidd, woss in die letzte Woche für Naduurgewallde üüwer verschiedene Geechende in die Welt unn aach in Deutschland reigebrocha senn, muss merr sooch, däss mir bei uns goornedd so schlacht laawe. S letzt Erdbeben zum Beispiel iss scho a knapp Johr her und woor, wie der Dr. Weiß als Innenstaatssekretär zurückgetraade iss. Zudem woor doss a rein boliddisch Beben und hodd daswacha kaum Schooda oogericht. Wollgebrüch mit Johrhunnertflute, Schlammlawine, Waldbränd – alles Fehlanzeige bei uns. Die Müllabfuhr unn die Busfohrer hömm noch nie g’streikt unn oo die letzt U-Bahn-Schlägerei in Neuscht konn sich aach scho fast kee Mensch merr derinner. Lawineabgäng odder Vulkanausbrüch in die Rhöö, Tsunamis odder Sturmfluuda oo die See in Burgwollbich, Friggehause, Sulzfeld odder Irmelshause – nix! „Owwer Hurrikans, Tornados, Taifune, Zyklone?“ fräächt der Gotthold. „Gotthold“, sooch ich, „wenn mir alleweil nedd grood intensiv Windkraftoolooche diskutier dääde, wösste mir bei uns doch goornedd, wos Wind üüwerhaupt iss!“ Apropos Windkraft bei uns. Alle Vorranggebiete liecha im östliche Landkreis unn somit also aach im Grabfeld, wo merr sich beim Nichtraucher-Volksentscheid neulich bekanntlich geecha a strikts Rauchverbot entschieda hodd. Jetzt fräächt sich nedd bloß die Fachwelt: Wenn die Windrood-Kolosse amoll stenn und mir hömm Ostluft – stinkts no hinner die Rhöö aus die Steckdose nooch Zigareddaraach? Frooche üüwer Frooche! Owwer doss nur naawebei. Der Gotthold hodd mich durch a weitere Tatsach‘ widder zurück zum Thema gebrocht. „Ich hobb neulich gelassd, däss jedes Joohr weltweit uugfahr 150 Menscha vo Kokusnüss erschloocha werrn, die vo die Kokosballme roo falle!“ „Siehstes, Gotthold!“, sooch ich. „Noch a Beleech defür, wie guuds in Rhön-Grabfeld ömm die Sicherheit für Leib unn Leben bestellt iss. Ich wösst nämlich vo keen enziche Menscha, der bei uns in die Geechend irchendwenn amoll vo a Kokosnuss erschloocha wurrn wär, die vo n Baam roogfalle iss!“ Servus, der Eustach. |
