| |
Scho erstaunlich, wenn mer sidd, wie a jungs Meedle wie die Greta Thunberg innerhalb vo kurzer Zeit hochgejubelt würrd unn in Sphären schwebt, vo die selbst a Dommas Gottschalk nur gedrääm konn. A Red vuurs Brandenburger Tor, fürrn Friedensnobelpreis vuurgschlooche wurrn unn die „Goldene Kamera“ gricht! A Veranstaltung, zu der gschätzt 90 % vo aller Gäst kurz midds Fluuchzeuch eigschwebt senn unn VW am End n SUV verschenkt hodd. Vielleicht wärsch jo gscheiter für die Greta gewassd, sie hädd den Pries onnder derre Ömständ goorned oogenomme!? Ich wässes nedd. Owwer doss jung Ding hodd jo racht! Mir müsse woss mach, ömm unnern Blaneede zu redde unn für die Noochwelt zu erhalte! S Brobleem iss: die Leut sehnn zum Beispiel bei a Auto nedd, woss alles hinne naus geblossd würd. Gut, wenn du heut a Auto mit zwee grösse, viereckige Ausbuffrohre sissd, konnsde dir scho vuurgstell, dess doo n Haufe Dreeg rauskünnt. Owwer seh dudd mer nix! Wurzel allen Übels: woss der Mensch nedd sidd, gläbbd er eefoch nedd! Früher bei die alte Diesel odder Benziner woor alles gloor. Wenn du doo een hinner her gforrn bissd unn vuur lauter Qualm unn Raach need gesenn hossd, wos sich vurrndro obgschbield hodd, woor gloor: a Stinker! Und genau doo müsst mer oosetz! Stell dir amoll vuur, of die Autobooh odder in die Stodt dääd a Porsche Cayenne odder a BMW X5 vorbeirausch unn den sei CO2-Ausstoß dääd durch a schworrze Wolke künstlich sichtbar gemocht weer. Lang dääd der sei Auto nixmer fohr, weil er üüwerool blöd oogeglotzt weered. Oder a Haus, wo schlecht isoliert iss unn üwerool die Wärm nausgedd, dääd ständig künstlich rach. Innerhalb kürzester Zeit dääd woss gemocht weer! Und mool dir doss weiter aus. Moderne Technik mechts möchlich. Alle „Abgase“ unn Gerüch, die a Mensch obgibt, würde durch a farbige Wolke für jeden sichtbar gemocht. In a Sauna bräuchste keen Aufguss merr zu mache. Unn wenn a Grübble Mensche zommstädd unn eener lässd anonym een fohr, weil er bisher jo nedd entdeckt wer konn. Aus! Hinne dääd a Wolke (ich schloo roode Raach vuur!) naufziech und jedes Leugnen wär zwecklos! Von weechn „Ich woorsch nedd!“ Aus unn vorbei! Technisch geht heut doch scho so viel. Also greufe mer oo unn mache allen Gstank der Welt ab jetzt sichtbar. Für a in jeder Beziehung allseits besseres Klima! Servus, der Eustach. |
