| |
Jetzt döff sich Neuscht zukünftich also wallich mit’n Diddl „Modellstadt für Elektromobilität“ schmügg. Weißer Raach iss bei die Sitzung vo’s bayerisch Kabinett bei sei Sitzung n vergangene Mittwoch in Kissinga aufgstiecha. Woss vill nedd wössa, iss jo, däss zwöscha dann Sitzungstermin und n Volksentscheid Nichtraucherschutz a direkter Zommahang bestanne hodd. Der Seehofer unn sei Truppa wollt jo ächentlich scho viel ährer üüwer die zukünftig elektrisch Modellstadt entscheid, owwer dann wollt merr doch erscht amoll obworrd, wie die Bewerber unn ihr Umland in Sachen Nichtraucherschutz obbstimme. Naawe Neuscht hadde ursprünglich jo aach Könnshoofa unn Mellerscht Oosprüch oogemeldt, Modellstadt für Elektromobilität zu wärr’n. Owwer wo Elektro iss, konn kee Raach g’sei, unn so stand nooch’s Ergebnis von Volksentscheid fest, däss Könnshoofa aus’m Renna iss. Die ehemaliche Kreisstädt senn irchendwie halt ömmer noch für ihr ehemalige Dürrfer verantwortlich und nochdem sich Aabscht, Herbscht, Trappscht unn Sulzdorf als enzicha im ganze Landgreis geecha n verschärfte Nichtraucherschutz entschieda hadde, woor gloor wie Glössbrüh, dässes mit Könnshoofa nix würrd. Owwer worömm worrn wohl ausgerechert die vier östlichste Landgreis-Dürrfer nedd gecha s Rauche? Gut, bei Aabscht iss’s gloor. Wenn der Bürchermässter a „militanter“ Raucher iss, konn sei Durrf nedd annerscht obg’stimm. Owwer Herbscht, Trappscht unn Sulzdorf? Alle wie sa senn midd’n deutliche Bevölkerungsschwund? Wohrscheinlich denkt merr do: „Gut, wenn merr sowieso ball nixmer doo senn, könne merr ach weiter gequalm wie die Schlööd!“ Mellerscht woor raus, weil die Gemee, wo bei’n Volksentscheid s Rekordergebnis obbgeliefert hodd, im Altlandgreis Neuscht licht: Wollwich! 78 Prozent geecha s Rauche! Owwer ob doss Ergebnis vo Wollwich, Ursprung vo a in Deutschland bis heut einmaligs Museum in Ööwerääls, nedd ball schlimma Folchen hodd, is obzuworrda. Ich sääh scho die nächst Entscheidung vo unner bayerisch Kabinett komma: „Schließung des Tabakpfeifenmuseums!“ Wenn eener woss nedd well, no braucht ersch schließlich aach nedd noch zu verehr’n. „Irchendwie gloor!“, meent der Gotthold. „Schließlich hodd jo der Sigmar Gabriel aa kee Angela-Merkel-Figürle off sei Nochtschrängla stenn, odder?“ Servus, der Eustach. |
