| |
Nuu isses soweit. Jetzt gricht also endlich aach die Geis-Greuzung a Ambel. Jedes moll wenn ich mit mein Fiesta vo die Stodt aus üüwer die letzt Neuschter Kreuzung rommbel, unn schier endlose 400 Meter lang kee Ambel mehr künnt, hobb ich Entzugserscheinunge, weil ich a halwe Minudda lang ohne rood, gaal unn grün auskomm muss. Und jetzt gädd mei Wunsch endlich in Erfüllung. Die Stodt unn die Bolizei wollt oo dann neuralgischa Bungd jo ächentlich liewer n Greisverkehr, owwer s Schweiferrder Straßenbauamt hodd sich durchgsetzt. Onder s Moddo „Die Greisverkehre sind tot, es lebe die Ambelkreuzung!“ würrd nuu also die nächst Lichtzeichenanlage (Ambelgreuzung döffa die Damen unn Herrn vom Amt jo nedd sooch) aufgebaut. Ob doss owwer ausgerechert oo darra Greuzung a guude Idee iss? Ich hobb merr nämlich middn Gotthold die Ärrwert gemocht, vo Richtung Müürscht die ganz Stregg zwöscha Angermüller unn eewa die besaachd Greuzung obbzufornn unn die Ambel zu zähla. Mir hömm n Bulldogg genomma, däss merr bei's Zähla nedd durchenanner komma senn. Ich bin g'forrn, der Gotthold hodd gezeehlt, unn wie merr die ominöös Greuzung bassiert hadde unn mir der Gotthold s Ergebnis gsocht hodd, hädd mich ball der Schlooch getroffa. Off därra Stregg vo insgsamt genau 5,3 Kilometer würrd jetzt die 13. Ambeloolooch gebaut! 13 Ambel of 5,3 Kilometer, also im Schnitt alle 408 Meter a Ambel! Doss schafft kee Großstadt! Obb merr sich doss Ganze nedd doch noch amoll üüwerleech sölled und doch liewer n Greisverkehr baut? Schwindlich iss merr vier Kilometer nooch n letzta Greisel bei'n OBI jo schließlich scho lang nixmer. Und wenn sich scho die Lufthansa nedd traut, in ihr hochmoderne Fluuchzeuche a Sitzreih' mit die Nummer 13 nei zu baue (doss iss fei wallich so), no würrd sich doch s Straßenbauamt vo Schweiferrd nedd traue, of ee unn dieselb Ströss die 13. Ambel aufzubaue? Die 13! Doo rommbelts doch no braggdisch jeden Dooch! Unn die villa Glühbirrnlich! Müssa alle durch Energieschboorlambe ersetzt wär. So langsam wie die oo gänn! Bis doo grün künnt, bin ich durch Herschfeld jo off die Autobooh! Und außerdem wär a Greisverkehr bei entsprechender Fohrweis sowieso schneller. S gidd nämlich Autofohrer, die forrn so schnell durch n Greisverkehr, dässa ihr ääches Nummernschild gelaas könna! Servus, der Eustach. |
