Glosse

Seit Oktober 2007 schreibe ich für die Main-Post die Glosse "Gotthold & Eustach" und beleuchte dabei verschiedenste, meistens ganz aktuelle Themen, mit der ganz besonderen Sichtweise von Gotthold und Eustach. Die Glosse erscheint alle zwei Wochen jeweils am Dienstag in der Bad Neustädter Ausgabe der Main-Post. Besucher unserer Internet-Seite können alle Glossen nachlesen.


Löcherstopfes

(15.06.2010)
 

Bevuur ich mich üüwer’s Dehma „Löcherstopfes“ ausläss, muss ich erscht n Begriff klär. Ich docht ömmer, däss mir zumindest innerhalb vo unnern Landgreis ee Sprooch reeda, owwer anscheinend iss nedd amoll doss der Fall. Wenn merr in’s Grabfeld vo Sogga rädd, meend merr die Hausschüh. Wenn da in die Rhöö vo Sogga reddst, senn owwer die Strömpf gemeent. Also ich reed jetzt vo Strömpf, unn zwor solche, wo Löcher dinn senn. Süsst worsch jo soo, däss s Löcherstopfa a dybbische Winterärrwed woor. Heut wärrn in Strömpf jo goor kee Löcher merr gstopft, weil sich unner Waggwarrfg'sellschofft mit ihr Strömpf so verhält wie a Ölscheich mit sein Mercedes: wenn der Öschabecher vool iss, würrd a Neuer gekäfft. Löcher stopfa heutzudooch bloß noch die Boliddiger, owwer für die iss doss mittlerweil die Hauptbeschäftigung wurrn. Die Europäer hömm ihr Probleme, die Löcher vo Griechenland unn Konsorrden zu stopfa, die Ami müsste ihr Haushaltslooch ach scho lang stopf, senn owwer alleweil verzweifelt domit beschäfticht, erscht amoll s Looch in’n Golf vo Mexiko zu stopfa. Schuld oo doss Loch iss die Firma, die n ganz eefocha Nooma hodd, den mir Frangge owwer ömms Verregga nedd ausg’sprech könna: „BP“ hässt bei uns „Be Be“, also genau so, wie die bekannt Firma, die G’sichtsgreem, Libbestiffde unn Fußspray herstellt. Womit merr widder beim Dehma Sogga oogelangt wärrn. Jetzt muss ich owwer doch noch amoll off die Finanzlöcher zurück komm, die unner Angela laufend stopf muss. Der Unterschied zwöscha Milliona und Milliarde iss uns jo spätestens seit die Finanzkrise verlurrn gange. So richtich bewusst, wos a Milliarde im Vergleich zu a Million iss, iss mir owwer neulich widder wurrn, wie mich der Gotthold g’fräächd hodd, wie langs wohl dauert, bis merr bis zu a Million gezählt hodd, wenn merr Dooch unn Nocht jede Sekunde ee Zohl hochzählt. 11 1/2 Dooch senns, wos jo erscht amoll nedd so üüwerraschend iss. Wie er mich owwer nochert als näxxdes g’fräächt hodd, wie langs wohl dauert, bis merr in gleicher Oord unn Weis bis zu a Millarde gezählt hodd und ich s Ergebnis g’hört hobb, bin ich ball vonn Stuhl gfalle. 11 1/2 Dooch senn’s bis zu die Million unn wahnsinniche 32 Johr (!!!) bis zu die Millarde! Recherts aus: 11 1/2 Dooch mal 1.000 = 11.500 Dooch, senn knapp 32 Johr. Veröggt, odder? Und doo döffsda dich bei 864.372.531 fei nedd verzähl, süsst gädds vo vurnn los! Servus, der Eustach.

 

 Übersicht 
 
   
© 2008 - 2009 NES-Online.de
(Bad Neustadt
)
Startseite - Aktuelles - Termine - Über uns - Glosse - Gästebuch - Kontakt