| |
Es iss doch wallich erstaunlich, däss merr monches erscht lernt unn kapiert, wenn merr scho im fortgschrittene Alter iss. Manschetteknöpf (enzeln, oft gülden unn schö verziert) zum Beispiel hobb ich früher als Kind monichmoll bei mein Vodder unn später bei nobel oogezochene Männer gsenn. Und docht, däss merr nerr bloß vo Manschetteknöf redt, wenn se wie oowe beschriebe aussänn. Wie ich neulich inn a Zeitung gsenn hobb, däss sich der Donald Trump a „45“ of sein Hemmärmel läss stick hodd, weil er der 45. Präsident vo die USA iss, hobb ich n zugehörige Text intressiert gelassd unn dabei erfohrrn, däss doss, wo er sich die „45“ hie less stick hodd, nedd wie ich gedocht hobb, eefoch s vürrder End vo sein Hemmärmel iss, sondern däss merr doss Dääl als „Manschetten“ bezeichnet. Und erst dann iss mir gloor wurrn, woröm Manschetteknöpf Manschetteknöpf hässe. Weil se die Manschetten voss Hemm zommhalte! Domit hodd praktisch jedes Hemm Manschetteknöpf! Ob jetzt die ganz eefoche, normale, oogenähte odder edle enzellne, wie ich se als Manschetteknöpf kenn, spielt domit gor kee Roll. S hodd een owwer aach nie jemand erklärt! Und genau doss iss mei Vorwurf. In die Schul lernt merr so vill Zeuch, woss merr nie mehr in sei Laawe braucht. Der Satz vonn Phytagoras zum Beispiel, Gleichunge mit mehrere Unbekannte, s genau Johr vo die Schlacht bei Issos (ihr wösst scho: „333 – bei Issos Keilerei“) und und und. Ower Zeuch, wo Kinner eefoch wöss müsse, ömm ohne böse Überraschunge durch ihr Leewe zu komme, do hörscht du weder vo Lehrer, Eltern noch Bekannte woss. Doss muss jeder sellwer erfohr. Wenn du jung bist und irchendwenn amoll oofängst, dich sellwer und allee auszuzieche und zu dusche, stellt jeder, der n Bullover droo hodd, unweigerlich zu seim Erschregge fest, däss er n Glommbe Fusselich in sein Nobel hodd. Als Erwachsener später kee Problem, merr wääs jo, woos herkünnt. Ower als Kind, wenn du s erscht moll Fusselich in dein Nobel entdeckst, rauspfuhlst und betrochtsd, wäss du nedd, woss los ist. Lös ich mich langsam auf?! Künnt do Dreeg vo inne raus?!!! Sowoss ghört der Kinner gelernt, dässe drauf vorbereit senn! A herrliche Vorstellung, wenn in die Schul „Lebenspraxis“ offn Stundenbloon steh würd, mer s zughörig Buch aufschloed und als Überschrift “Fusselchen im Nabel“ les würrd. Odder nedd? Servus, der Eustach. |
