| |
Jeden Samstich, wenn ich in die Zeitung die Stellenanzeiche laas, wunner ich mich drüü, woss heutzudooch in die Zeide voss Andidissgrimminierungsgsetz für Kopfständ gemocht wäär müsse, ömm sich nedd stroofboor zu mache. „Schlosser(in) gesucht“, laas ich doo zum Beispiel, odder „LKW-Fahrer (m/w)“. Dabei iss doch bei solche Beruufe scho vuurhaar gloor, däss a Moo genomma würrd. Jetzt stell dir amoll vuur, die Noochwuchssurcha vo unner Franziskaner oowen Kreuzberg werrn noch grösser wie jetzt scho und der Pater Guardian müsst sich als „ultima ratio“ für a Stellenanzeich entscheid. „Bruder(in)“ müsst no g'schriewa wäär odder „Bruder (m/w)“. Odder noch schlimmer: „Bruder/Schwester“! Und do wäär jo erscht racht gloor, däss nur a Moo in Frooch käm. Scho lang wunner ich mich unter derra Ömmständ, däss bis jetzt mööchlich iss, woss sich s vergange Wochenend widder obbgspielt hodd. Die Könnshööfer Männerwallfohrt iss mit üüwer 380 Männer aus n ganze Landgreis die mehr wie 60 Kilometer vo Könnshoofa off Vierzahheiliche gewallt. S iss weit und breit die ennzich Wallfohrt, die soo a lange Stregg oo een Dooch absolviert und s iss aach nooch wie vor in die ganz Geechend die ennzich Wallfohrt, wo nerr blooß Männer midd döffa. Die Frooch iss nur, wie lang noch. Wenn doss amoll bis zu die EU-Kommission in Brüssel dringt, isses nämlich aus mit a Wallfohrt nerr bloß für Männer. Und woss wär doss für a Ömmstellung für die männliche Wallleut, wenn nooch 65 Johr s erschtmoll aach Weibsbiller mit wall döffeda. Die, wo jetzt scho gemischt walle, könna a Lied devoo g'sing. Erschtens wäär die Wallfohrt in een Dooch gornixmerr zu schaffe, weil die Biesbause deutlich länger dauer dääda. Von weechen amoll schnell rachts noo gewallt, sei G'schäft gemocht unn hinna nooch gerennt! Odder s Eireiwa vo die Oowerschenkel, ömm keen Wolf zu griecha. Während jetzt „unter Männern“ frei vo neugiericha Bligge oo die sensible Stella ungeniert drauf loos geriewa weer konn, müssed nochert ömmer aufgebasst wäär, dess nedd grod a Wallfraa heerguggt. Kee dreggeder Witz merr (söll off a Wallfohrt sowieso nedd verzehlt waar!), kee Nochpfeufess vo schönna Meedlich inn die Dürffer, kee Sauferei merr bei die Üüwernochtung, weil die äächa Fraa mitwallt. Hör merr doch auf! Die Könnshööfer Männerwallfohrt gädd unsichere Zeida entgeecha! Servus, der Eustach.
|
