| |
Auh, auh, auh – doo hodd sich unner ach so gründlichs und gewissenhafts Land widder n Bolza geleist! Ihr hobbds sicher alle in die Zeitung gelasst, odder? Scho seit a boor Johr gidd’s neue Verkehrsschilder und a boor allzu eifricha Beamte hömm doch glodd g’fordert, däss alle alte Schilder jetzt schnell geecha die neue Dinger ausgewechselt wäär sölle. 400 Milliona hädd der ganz Spaß gekossd! Owwer nedd mit’n „Ramses“, unnern graumelierte, ömmer braungebrönnda Verkehrsminister Ramsauer. Schmarrn, hodd der g’socht. Nix würrd gedauschd, die Städt und Gemee sölla mit doss Geld liewer die Löcher in die kabudde Ströss’ stopf. Ich hobb mir midd’n Gotthold amoll drei Beispiele oo Schilder oogeguggt und „Alt“ und “Neu“ verglicha. Scho indressand. Off’s Schild „Achtung! Zebrasträäf!“ hodd der Moo, wo off’s Schild hurrdich üüwer dann Strääf gädd, jetzt keen Hut mer droff und jetzt sidd mer erscht amoll, däss der jo gorkee Hoor hodd! Dos iss praktisch der Herr Tisch: Oowa die Bladda, onnda die Bee! Der würrd sich sauwer ärchern! Odder s Schild „Achtung! Wildwechsel!“ D’rr Hirsch odder Räähboog im Sprung wirkt jetzt irchendwie eleganter und hodd vor allem bei die Vürrderläuf a deutlich bessera Haltung. Sei Geweih is jetzt klenner wie off’s alt Schild, owwer derfür musser ehrlich zugabb: er hodd zuugenomma! Betrocht n doch amoll: der iss deutlich besser benanner wie vurhaar. Owwer worömm ach nedd? Wenn die Menscha ömmer fetter wärr’n, worömm denn nochert nedd ach die Hirsch? Und s bloo Schild „Fußgängerwaach“. Die Mudder hodd sich a Bladda läss schneid, ihr Roog mecht sa onndarömm irchendwie unvorteilhaft, owwer dooderfür lässd s Kind jetzt die Bee und die Füss nixmer so schläff wie vuurhar. Hadd jo aach furchtbor ausg’sänn! Und wie ich midd n Gotthold neulich in so n Fußgängerwaach neilaff wollt, nimmt er mich off eemol bei die Hand. „Hööih!“, soch ich. „Wisst do een of Westerwelle odder Wowereit mach???“ „Nix!“, seecht er, deut of doss Schild und seecht: „Guck doch, do muss mer sich führ!“ Servus, der Eustach. |
