| |
Heut gädd mersch ömm zwee Dehmen, die off n erschta Bligg nix mitananner zu dunn hömm, offn zwedda owwer scho. Die Rhöö iss jo bekanntlich scho seit a boor Johr a so genannt’s Biosfäärenreserwaad, wodurch Milliona vo Fördermittel in unner Geechend g’flossa senn. Alle zääh Johr würrd nuu vo die UNESCO üüwerprüft, ob alle Voraussetzunga für so a Gebiet noch erfüllt senn und für die Rhöö is doss 2013 widder der Fall. Und s Problem bestädd dodinn, däss a Biosfäärenreserwaad mindestens drei Brozennd „Kernfläche“ aufweis muss. Die ganz Rhöö künnt derzeit owwer insg’samt ner blooß of 2,2 %, wobei unner bayerischer Dääl mit 0,53 % mit Abstand n schlechtesda obbschneid. Es muss also deutlich mehr Kernzone ausgewiesa wär und die Verantwortlicha überleecha fieberhofft hie unn haar, wie doss zu mache iss. Gleichzeitich senn merr neulich in die Zeitung üüwer die Daadsach informiert wurrn, däss die Bevölkerung in unnern Landkreis Johr für Johr obnimmt. Midd’s Gewicht hodd doss nix zu dunn, owwer mir werr’n ömmer weenicher! Fein säuberlich kannt merr gelaas, däss merr seit 2001 scho mehr wie 3.000 Leut weenicher wurrn senn! Der Gotthold hodd sich gor die Ärwedd gemocht, alle Dürrfer inglussief vo ihr Ortsdälle zu sortiern und siehe da: alle Dürrfer vo die ööwer Rhöö worrn bei’n Rückgang in die erscht Hälft gelaache unn Sondheim/Rhön hodd mit minus 11,5 % n Voochel oog’schossa. Und domit komm ich widder off die fehlend’ Kernzone in’s Biosfäärenreserwaad zurück. Löst sich doss Problem domit nedd ball vo allee, unn hömmer ledichlich a Zeitproblem? A Kernzone iss gemäß die UNESCO als a Bereich definiert, in dann sich (ich zitier) „die Natur ohne jegliche wirtschaftliche Aktivität des Menschen entwickeln soll.“ Nix leichter wie doss! Inn a Durrf in die ööwer Rhöö wirtschaftlich nix zu mache, iss doch heut scho kee Problem! Unn die Leut senn (guck oowa) sowieso ball furrt. Und ich säh scho dann Dooch komma, wo die erschta Dürrfer in die Rhöö vo die UNESCO odder egal vo wann n Diddl „Durrf“ oberkannt griecha, weil kee Menscha merr dürrt laawa. Und noch weiter gedocht, würrd die Zeit komma, wo Tierschützer fordern, in bestimmta Kernzona in die Rhöö Menscha auszusetza, däss die villa Tiere dürrd noch langer Zeit widder amol n Menscha sänn. Schlimma Aussichta, odder nedd? Servus, der Eustach. |
