| |
Woss die Siemens in die Neuscht vuur hodd, intressierd naddüürlich aach n Gotthold und miich und mir zwee senn mit die Siemensianer voll solidarisch. Dasswaacha wella mir zwee aach bei alle Aktiona mit mach, die jetzt nei’s Laawa geruffa wurrn senn. Bei die gröss Demonstration n 10. Februar worrn mer dabei und doss woor fei wallich mei Labbdooch s erscht moll, däss mir demonstriert hömm. Mir üüwerleecha jetzt ernsthoft, ob mer dos beicht müssa. Womit mir uns jetzt befasse, owwer nedd so richtich weiterkomma, iss a Brief oo dann berühmt-berüchdichde Siemens-Chef Löscher in München. Alles iss in die Zeitung jo schö erklärt worrn. Merr söll jeden Middwoch n neue Brief schreib, oo die richtig Adress schegg und wenn’s gädd ach a Kopie oo die Main-Post gabb, weil die die Brief veröffentlich wella. Jetzt hobb ich mich also neulich midd’n Gotthold hie g’setzt, ömm unnern erschta Brief oo dann Löscher zu schreiwa. Däss mir uns nedd leicht domit dunn, noch 20 Joohr widder amol n Brief zu schreiwa, könnt ihr euch sicher vuurg’stell. S iss ächentlich ganz gut los ganga und mit Ort und Datum und die Adress hatte mer kee Problem. Stegga gebliewa senn mer nochert gleich bei die Ooreed vo dann Löscher. Wie schreibe merr doo, woor die Üwerleechung. Wenn mir dann Löscher amoll richtich die Meinung stegg wella, no woor gleich ausg’schlossa, „Sehr geehrter Herr Löscher“ odder „Guten Tag Herr Löscher“ zu schreiwa. Erschtens wünscha mir dann Herrn keen guuda Dooch und verehr’ dunn merrn scho gleich goornedd. „Hallo Herr Löscher“ wär scho ährer ganga, owwer selbst doss woor uns zu freundlich. Der Gotthold hodd vuurg’schloocha zu schreiwe „Löscher, jetzt pass amoll auf!“ und doofür hömmer uns nochert aach entschieda. Nochdem mir a ganze Seite lang vom Laader gezoocha hadde (dann Löscher klingeln wohrscheinlich heut noch die Ohrrn!), gings ömm die Grußformel. „Hochachtungsvoll“, „Ergebenst“ odder goor „Untertänigst“ worrn völlig ausg’schlossa, so dässes letztlich schtrömpfich und ohne Gruß midd a schlichts „Gotthold & Eustach“ geend’ hodd. Der nächst Schritt iss jetzt die gröss Unterschriftenaktion. Owwer obb mer do aach mitmache? Bei die Siemens woss unterschreib? Do iss doch so gut wie sicher, däss da 4 Woche später n neue Staubsauger geliefert grichst. Dasswacha brommts nämlich alleweil bei die BSH mit Ärrwedd soo! Servus, der Eustach. |
