| |
Ees well ich gleich vurrnaus schegg: wie mei Koleech, der H.P., findes aach der Gotthold und ich subber, woss die Hööschter in die vergangene Mooned mit ihr Riesen-Erndegronne geleist hömm! Owwer woss neulich bei die Grün Woche in Berlin bassierd iss, doss hömm mir uns doch a weng genauer oogeguggt. Die Groone wor jo bekanntlich nei unner Hauptstodt kutschiert worrn, ömm sa bei die weltbekannt Ernährungsmess’ zu bräsentier’n. In drei Dälle musst sa zerleecht weer, ömm sa üüwerhaubt doo nauf zu brenga. Unn wie sa jetzt in die Hall 23a g’stanne wor unn unner Landwirtschoftsministerin a Ooschbrooch vuur die Hööschter Groone g’halda hodd, isses bassiert: a Addendaad mit Kardoffel iss off die Ilse Aigner verüübt wurrn! Zwee Kürrb voll hodd mer mir nix dir nix der Ministerin vuur die Füß gekibbt! Furchtboor! Gleich hodds g’hässa, däss dos Greenbies (wenn mei Urin so a Forb hädd, dääd ich nedd demonstrier, sonder zunn Doggder gääh!) aus Protest weecha Gen-Kartoffel wor. Owwer ich hobb doo a ganz annere Deorie. S gitt zwor zwee mööchliche Moddive, owwer wenns ömm Kartoffel gädd, konn eefoch nur ee Durrf dehinner g’stegg: Hollscht, s grössd Kartoffelanbaugebiet vo die westlich Welt!!! Wer denn süsst? Entweder, der Hollschter hodd’s g’stunga, däss ihr Nochberdurrf so ins Rambbelicht g’stanne wor, unn sie hömm Greenbies die Munition für doss Addendaad geliefert odder die Hööschter hömm sich mit die Hollschter zomm gedönn und den Ooschlooch ner bloß läss verüüb, däss die Groone noch mehr in’n Middelbunkt stätt wie soo scho. Zuzutraue isses der Hööschter, weil schließlich hömm sa mit n Pfarrer Mathiowetz jo n reechelrechde Babblissidi-Broofi in ihr Reihe! Unn wos mich und n Gotthold in dann Zeitungsbericht vo Berlin noch gewunnert hodd, iss, wie viel Köönichinne dässes in Deutschland gidd. Von weechen, mir senn kee Monarchie merr! Vo a Weinkönigin hömm mir jo gewössd, owwer dääses aach a Karpfen- und a Margeritenkönigin un sogoor n Linsenprinz gidd, doss wor uns nu doch neu. Däss owwer die Spinatkönigin und der Brönnessdelprinz nedd do worrn, doss hodd die Hööschter scho a weng geärchert. Der Gotthold hodd mit’n Witz widder n Voochel oog’schossa: „Wie hässt a Hollschter, wenn er in Berlin iss und nei a Bordell gädd?“ Wellt ihrsch wöss? „Kartoffelpuffer!!!“ Servus, der Eustach. |
