| |
Mir is scho kloor, däss ich heut, kurz nooch n erschta Advent, nedd grood üüwer Hünneräär schreib söllet. Ower es iss mir eefoch a Bedürfnis, weil mer der Gotthold wos verzehlt hodd, wos ich eefoch nedd geglääb konn. „Die Firma Glaggso Schmitt Klein, die wo in Dresden den Impfstoff geecha die Schweinegrippe brodduziert, braucht für die Herstellung vo dos Zeuch jeden Dooch 380 000 Hünneräär!“ 380 000 Stück! Jeden Dooch! Dos muss mer sich amoll off die Zunge läss zergääh! Ich sooch's jo scho ömmer. Im Vergleich zu villa annera Tiere senn Hünner jo sowos vo domm. Leecha jeden Dooch zuverlässig und broov ihr Äähr, grieches owwer genauso zuverlässig widder wagg genomme. Und leecha trotzdem jeden Dooch widder a Neu's. Johrelang! Weil sa sich furrtpflanz wella unn ihr Oort erhalt wella. Genau doss und nur doss is aus Sicht vo die Huh doch der Grund für die ganz Bloocherei.
Owwer naa, der Mensch zeicht keine Einsicht! Wagg mit die Äähr, raus aus s Naast, ner blooß weil widder amol eener Hunger of a roohs, a gekochts, a Rühr- odder a Spiecheläähr hot. Odder weil a Kuche gebacke oder Nudel gemocht wer sölla. Eine Uuverschaamtheit sondersgleichen! Genau genomma is jedes Ähr, wo mer a Huh waggnimmt, a Schwangerschaftsabbruch! Owwer do hörrschta vo die Kirch, n Baabst, die Bischöf odder die Pforr keinen Doon. Im Geechadääl. Die mache do noch mit und lässe sich die Äähr genauso schmeck wie alle annera Menscha aa. Und jetzt opfern sich die domma Hünner aach noch für die Schweinegrippenimpfung auf und mache Üüwerstonn bei's Leecha. Und römmgedreht? Wo worrn denn die ganze Säu, wie mer die Vogelgrippe hatte, hä? Hodd do vielleicht ee Sau a Äär für'n Impfstoff geecha die Vogelgrippe geleecht? Pfäufadeggel!
Ich wenn a Huuh wär, wär gleich ferrdich. Wenn ich vier Woche lang leech dääd und jeden Dooch kääm eener und nahmet mei Äähr aus mei Naast raus, wär's aus. Nedd amol ee Äähr däd vo mir noch of die Welt komm. Schluss, aus, ferrdich! Ich wääs scho, däss ich nochert in Lebensg'fahr schweb dääd, ower wer seecht denn, däss die Bremer Stadtmusikande nedd aa noch a Huuh gebrauch könnda? A wenn ich kee Musik g'spiel könnt, für's Essa of n Waach nauf noch Bremen könnt ich g'surch. Do dääda sich Eesel, Hond, Katz unn vur allem unner Gööger garantiert schwerrer wie ich! Servus, der Eustach.
|
